IVA ta saca remedi Valsartan for di mercado

0

Inspectie Volksgezondheid Aruba (IVA) a haya notificacion cu tin un cierto produccion (batch) di e remedi Valsartan di e fabrica Pharmachemie cu a wordo saca for di mercado na Boticanan na aruba pa motibo di contaminacion. E remedi Valsartan ta wordo prescribi pa individuonan cu ta sufri di presion halto y cu problemanan di curason.

E accion di e batchnan di Valsartan di Pharmachemie cu a wordo saca for di mercado na augustus 2018 ta trata door di e producto N-nitrosodimethylamine (NDMA). E biaha aki e batchnan ta contene e stof N-nitrosodiethylamine (NDEA): un producto cu door di e proceso di fabricacion di Valsartan lo por wordo crea y cu posiblemente por aumenta e probabilidad pa haya cancer. Sinembargo, e chens cu en berdad por haya cancer door di bebe e remedi Valsartan cu ta contamina cu NDEA ta hopi chikito.
Na Aruba e remedi generico valsartan ta obtenibel cu receta di dokter na botica. E compania farmaceutico Pharmachemie na Hulanda cu ta produci y distribui e remedi Valsartan a avisa e importadonan di remedi na Aruba y Inspectie Volksgezondheid Aruba di e contaminacion y e riesgo. E importadonan a verifica cu tin batchnan contamina cu a wordo importa na Aruba y a tuma e accionnan necesario pa informa e boticanan debidamente. Seguidamente, e boticanan a kita e batchnan aki for di nan botica.
Ta trata batchnan di valsartan di e marca Pharmachemie cu RVG-nummers:
RVG102397;
RVG102398;
RVG102399;
RVG102756;
RVG102762,
RVG102764,
RVG102765.

E Inspectora di Remedi, drs. Roselynn Angela (Boticario) ta conseha esnan cu ta uzando e remedi generico Valsartan pa no stop di bebe esaki y ta urgi pashent cu tin preocupacion of pregunta pa acudi na nan botica. Tambe e Inspectora di Remedi ta pidi tur pashent cu ta uza e remedi aki pa controla e RVG-nummer patras riba nan paki di remedi. Si e RVG-nummer ta cuadra cu e batch cu a wordo saca for di mercado, pashentnan por tuma contacto cu nan botica pa mas informacion. Inspectie Volksgezondheid Aruba lo informa pueblo di cualkier cambio na su debido momento.

E carta di e compania farmaceutico y e lista completo di e batchnan cu a wordo saca for di mercado por haya ariba e website di Inspectie Volksgezondheid Aruba.

20181203_Recallbrief Valsartan TEVA -PCH_Lijst RVGnummers

 

Comments

comments