No ta keda niun duda cu e italianonan ta keda domina e deporte di Beach Tennis mundialmente. Diadomingo ultimo nos por a presencia e fia final di e Aruba Beach Tennis Open 2016. Organisadonan tabata teme cu lo no por a termina e torneo debi na e tantisimo awa cu a cay. Terminando esaki e dia siguiente no tabata un opcion mirando cu mayoria hungador a regresa nan pais bek e anochi ey caba of e dialuna tempran, pero Danki Dios tur cos a resumi bek pa 2or di atardi caminda a sigui cu e semifinal nan den e categoria Pro Doubles como tambe e quarter finals di e otro categorianan esta fun, intermediate y advances doubles.
Den e prome semi final di hende homber nos tabata tin nos atleta local, Aksel Samardzic hunto cu su partner di Brasil, esta Vini Font, kende nan a cay venci for di e fuerte ekipo di Alessandro Calbucci y Marco Garavini di Italia. Nan mester a enfrenta e campeon nan di 2015, cu ta Michel Cappelletti y Luca Carli. Por menciona cu e mes un 2 ekiponan aki a bataya pa saca e ganadonan den 2015 y e aña aki, un biaha mas Cappelletti y Carli ta sali victorioso di e bataya aki. Un tremendo wega sigur, pero ya desde un principio di e torneo por a saca e conclusion cu e ekipo italiano aki a bin cu e unico meta pa defende nan titulo di 2015
Pa loke ta e e categoria di Pro Women Doubles, tabata un sorpresa total di mira e 2 hobennan Ninny Valentini y Martina Corbara den e final contra di Veronica Visani y su partner Flaminia Daina. No cu e ekipo aki no tin e talento pa yega asina leu, sino cu mirando e tantisismo ekipo nan cu tabata participando, cu top playernan entre nan, sigur sigur a pensa cu lo tabata tin otro ekipo den e final. Valentini y Corbara, cu un estilo completamente diferente cu tur otro ekipo cu nos a presencia den e torneo, a sa di desbalansa tur ekipo, saca nan for di nan ritmo usual, pa asina aki, prome den e semi final, manda e duo di Particia Diaz di Venezuela y Mathilde Hoarau di Francia. Pa despues nan yega den final contra Visani y Daina, kendenan tampoco por a haya nan ritmo y na final a cay venci den 2 set
Den su totalidad e organisacion di Beach Tennis Aruba ta mira atras riba un torneo sumamente exitoso, caminda casi 1200 participante a representa un total di 32 pais. Un asistencia increiblemente grandi, ainda no tin e cifra exacto di esaki pero ta premira cu tabata tin mas hende cu a presencia e weganan compara cu 2015. Un torneo di calidad halto, seguridad na cada skina pa esnan cu a presencia y participa e siman henter. No ta keda nada otro pa gradici cada un persona cu a aporta pa haci’e un torneo exitoso: participante, sponsor, organisadonan como tambe cada un cu tabata presente na Eagle Beach durante e torneo, DANKI un biaha mas y nos ta cuminsa e “count down” pa Aruba Beach Tennis Open 2017.