Minister di Defensa di Israel, Yoav Gallant, a anuncia dialuna fin di e combatenan di intensidad halto den e parti nort di Gaza Strip, caminda cu e tropanan Israeli ta sigui cu e operacionnan terestre di menor escala despues di a derota tur e batayonnan di Hamas den e zona.
E forsanan Israeli tambe pronto lo finalisa e “fase intensivo” di e combatenan den e parti zuid di e enclave Palestino, Gallant a agrega, referiendo n’e area di Jan Yunis.
“E Forsanan di Defensa di Israel ta enfoca riba e cabes di e colebra, e liderazgo di Hamas,” Gallant a declara, splicando cu, como parti di e enfoke aki, “e brigada di Jan Yunis ta desintegrando gradualmente como un forsa di combate.” Den e sentido aki, e minister a añadi cu e tropanan Israeli a corta e careteranan y e tunnelnan cu ta conduci na Rafah, ciudad frontera cu Egipto.
Te asina leu, e militarnan di e pais Hebreu ta trahando den e enclave Palestino pa localisa e ubicacionnan restante di Hamas y mata of captura tur e integrantenan.
Papiando riba e futuro di Gaza, Gallant a sigura cu “e lo wordo goberna p’e Palestinonan” y cu su futuro gobierno “mester surgi for di Gaza Strip.” “E fin di e campaña militar mester keda ancra den un acto politico,” el a conclui, advertiendo cu e “indecision politico por perhudica e avancenan di e operacion militar.”