TEL AVIV, Israel- E prome minister Israeli, Benjamin Netanyahu, a suspende diamars e acuerdo nobo cu e agencia di refugiado di ONU, pa reubica miles di inmigrante Africano den e pais, segun AP.
E decision di e mandatario Israeli a bin door di e reunio cu e tabata tin cu un grupo di residentenan di e sur di Tel Aviv, cu a expresa nan rabia y preocupacion pa e recien acuerdo cu Netanyahu a anuncia dialuna.
Di mes manera, e Prome Minister di Israel a ricibi fuerte criticanan di su aliadonan nacionalista, incluyendo miembronan di su mesun partido, e Likud. Lider di e Partido Laborista, Avi Gabbay, a califica e decision como “tristo, preocupante y incluso ta duna un poco miedo”.
Segun e acuerdo, rond di 16250 di un total di 37 mil migrante Africano, mayoria di nan procedente di Eritrea y Sudan, lo wordo reubica den paisnan occidental, mientras cu e resto lo wordo permiti pa keda na Israel. E cuestion aki a dividi Israel durante un decada, cual tabata motibo di criticanan duro contra di Netanyahu.
Di su banda, ONU a urgi Israel pa reconsidera “e cancelacion di e acuerdo riba migrantenan Africano”.
Fuente: https://actualidad.rt.com