E fachada di un anfiteatro data for di siglo II y un otro monumento antiguo den e ciudad historico di Palmyra, Siria a wordo destrui pa militantenan di e Estado Islamico.
Segun informenan, ISIS destrui parti di e anfiteatro y a daña varios tetrapilon, un structura cuadra di cuater pedestal, cada uno cu cuater kolom. Segun informenan, e pedestalnan aki ta mustra di a wordo destrui intencionalmente, uzando explosivonan.
E destruccion di structuranan antiguo ta un otro intento di e grupo pa impone su boluntad door di destrui monumentonan historico of artefactonan cu, segun nan, no ta cuadra cu nan interpretacion estricto di Islam.
E destruccion di sitionan historico na Irak, Libia, Siria y otro camindanan, a causa un furia internacional. UNESCO a califica e accionnan como “limpiesa cultura”.
E destruccion di e dos sitionan na Palmyra lo a tuma luga dia 11 di Januari. Esaki segun e Syrian Observatory for Human Rights, cual ta un grupo cu base na Gran Bretaña. E grupo di observacion aki a bisa cu e actonan aki lo por ta un demostracion di forsa prome cu e grupo retira for di e ciudad, ya cu nan ta bou atake na Irak y Siria.
ISIS a retoma Palmyra na December, nuebe luna despues cu e forsanan gubernamental Sirio, apoya door di Rusia a saca e grupo aki for di e ciudad. E grupo militante aki a terorisa ciudadanonan y a destrui varios monumentonan historico den e ciudad, segun UNESCO.
Na Mei 2015, ISIS a captura Palmyra di biaha a cuminsa destrui sitionan cultural, ehecutando habitantenan cu a keda den e ciudad. Den cuestion di luna, e militantenan a cuminsa plunder y destrui artefactonan antiguo, incluyendo e replica di e Arco di Triunfo, di 1800 aña bieuw y e Tempel di Baalshamin, di casi 2 mil aña.