MOSUL, Iraki- Diaranson militantenan di Estado Islamico a destrui e Gran Meskita di al- Nuri, famoso pa su minaret dobla, segun ehercito Iraki a bisa den un comunicado.
Den e pulpito di e meskita medieval aki, e lider di e militantenan, Abu Bakr al-Baghdadi, tres aña pasa a proclma un califato cu tabata ocupa teritorionan amplio den Irak y Siria. E agencia di noticia di EI, Amaq, a acusa e aviacion Mericano di e destruccion di e meskita.
“E banda terorista di Daesh (acronimo den Arabier pa referi na EI) a comete otro crimen historico ora cu nan a bombardea e meskita di al- Nuri y su historico minaret di al- Hadba”, el comunicado di e ehercito Iraki a señala.
E explosion a tuma luga mientras unidadnan di elite di Servicio Antiterorista di Irak (CTS na Ingles) tabata profundisa nan bataya pa retoma e Old Town di Mosul y nan tabata na 50 meter for di e meskita.
E forsnanan militar apoya door di Merca a diamars a rondona e bastion cu e grupo yihdista tin den e Old Town, e ultimo distrito bou di su control na Mosul.
Baghdadi a autoproclama su mes Califa, of gobernante di tur e musulmannan, desde e pulpito di e meskita dia 4 di Juli 2014, despues cu e insurgentenan a conkista gran parti di e zonanan di Irak y Siria. E bandera preto tabata bula ariba e celebre minaret dobla desde Juni 2014.
Funcionarionan Iraki den priva a expresa nan speransa di cu e meskita lo por a wordo retoma na tempo pa Eid al-Fitr, e festival cu ta marca final di Ramadan, luna di ayuno musulman. E prome dia di Eid e aña aki ta cay dia 25 of 26 di Juni na Irak.
Fuente: www.reuters.com