Mesa di redaccion di Masnoticia.com a ricibi varios reaccion riba iregularidadnan cu a tuma luga diahuebs mainta na Colegio Arubano na San Nicolas.
Segun comentarionan parce cu a sosode un discrepancia durante examen di HAVO Nederlands na Colegio San Nicolas.
Den diferente klas a habri envelop di Hulandes y di Economie te cu a parti nan sin cu e docentenan a ripara cu tin dos vak diferente.
Pues algun mucha tabata tin examen di Hulandes nan dilanti, mientras cu otronan tabata tin examen di Economie nan dilanti.
E docentenan ta bisa cu e muchanan no a habri e examen wak aden ainda.
Kende por sigura cu ta berdad cu ningun mucha a wak den e examen Economie?
Ora cu a ripara e fayo, a core pidi tur examen di Economie. Scol a para examen pa algun minuut, mientras cu a busca e otro envelopnan di Nederlands.
No solamente esaki ta un blunder grandi di Colegio San Nicolas, pero tur e bruhamento y paramento di examen pa busca e otro enveloopnan di Nederlands, ta causa insiguridad y ta kibra trankilidad necesario ora di traha examen.
Examen ta un asunto serio y mester traha safe y resPONSABEL.
Esey no tabata e caso awe mainta na Colegio San Nicolas.
E rector su so a traha e pakketnan. E so a prepara e envelopnan pa bay pa e 6 diferente klasnan.
E docentenan den e klas ta suppose di controla y lesa loke ta skirbi riba e envelopnan. nan lo a lesa un y no a controla e otro envelopnan. Cada klas a haya 2 envelop.
Rector, Hubert Goedgedrag, ta esun cu a manda envelop robes pa e klasnan y e docentenan no a controla e envelopnan bon prome cu a habri esakinan.
Inspectie di Enseñansa mester bisa awo kico lo bay pasa cu e envelopnan di Economie cu ta habri caba, tabata loke nos a ricibi como informacion.
Masnoticia.com a tuma contacto cu rector di Colegio San Nicolas, pero pa awor aki e no tabata tin comentario al respecto, te ora cu e papia cu e departamentonan concerni.