TEHERAN, Iran- Iran lo responde cu medidanan ekivalente si Merca purba blokia su exportacionnan petrolero, segun e minister di Relacionnan Exterior di Teheran a informa diamars.
Autoridadnan Mericano ta intensificando nan esfuersonan pa presiona paisnan pa stop di importa petroleo Irani.
“Si Merca kier dal un paso serio den e direccion aki, definitivamente e lo topa cu un reaccion y medidanan ekivalente di Iran”, segun e vocero di Ministerio di Relacionnan Exterior, Bahram Qassemi, cita pa e agencia di noticia estatal IRNA.
E lider supremo Irani, e ayatollah Ali Khamenei, diasabra a apoya e sugerencia di e presidente Hassan Rouhani di cu Iran lo block exportacionnan di petroleo di Golfo Persico si su mesun exportacionnan wordo interumpi.
E relacionnan tenso entre Teheran y Washington a bira pio den e ultimo dianan.
Dialuna Iran a rechasa un advertencia rabia di presidente Donald Trump di cu e ta risca consecuencianan teribel “manera poco biaha den historia” si Merca wordo menasa.
Presidente di parlamento di Iran, diamars a describi e comentarionan di Trump como “palabranan di un hacido di desordo”.
“Merca ta experimentando cu desordo y salvajismo den su relacionann diplomatico”, Ali Larijani a bisa, cita pa IRNA.
Irán varios biaha a hay’confronta cu menasa di sancionnan di Merca desde cu Trump a dicidi di na mei ultimo di retira su pais di un acuerdo firma na 2015 entre e potencianan mundial y Iran pa nan polemico acuerdo nuclear.