IPKO 2021: ‘Tur pais ta experienciando ‘Corona-Moeheid’

Parlamentario Daphne Lejuez durante reunion IPKO 2021

Dia 6 y 7 di Januari 2021 a tuma lugar IPKO (Interparlementair Koninkrijksoverleg). E aña aki Aruba lo mester a ta e anfitrion, pero pa motibo di COVID a opta pa un IPKO mas informal/virtual via Zoom. Durante e reunionan cada Pais a haña oportunidad pa duna un presentacion di e situacion di cada Pais den cuadro di COVID y hiba discussion riba toca topiconan manera:

– Restart economico
– COHO
– Reforma gubernamental
– Reforma financiero y economico
– Situacion socio-economico
– Economia duradero
– Mercado laboral

Segun parlamentario Daphne Lejuez, e tawata hopi interesante pa tende di cada Pais den Reino nan experiencia cu e Pandemia. Tur Pais ta experenciando “Corona-moeheid” locual ta pone retonan pa sigui mantene na reglanan di Corona, pero e vacuna ta trese perspectiva cu lo por trese mas trankilidad social.

Tambe a papia tocante di resiliencia economico y seguridad alimenticio, unda cu ta importante pa stimula agricultura pa por suministra cuminda saludabel pa e poblacion. Aki a toca e retonan manera prijs di awa y clima, pero tambe oportunidadnan usando technologia pa por logra esaki.

Hulanda dentro di poco lo bai hiba un debate riba e implementacion di un ley pa hasi e PCR-test y vacuna uno obligatorio pa por biaha pa Hulanda, y aki a trese dilanti pa tene cuenta con esaki no solamente lo afecta Hulanda, pero tambe considera con esaki lo por afecta otro Paisnan den Reino.

Tocante di COHO, e islanan a duna di conoce cu mientras ta compronde y acepta supervision financiero pa por ricibi e Liquiditeitssteun, no tur medida den Landspakket tin “raakvlakken” cu e sosten financiero y/of ta relevante pa e capacidad di por paga bek e lening. Tambe a toca e (falta di) rol di Parlamentonan di e islanan den e proceso pa yega na e Rijkswetten pero sigur tambe despues di yega na e acuerdonan y bai over na e ehecucion di e Landspakketen.

Lejuez: “Riba su mes un bon reunion pa ta na altura di loke ta pasando den Paisnan den Reino, particularmente durante COVID cu ta un pandemia cu a afecta nos tur parew, y unda por intercambia solucionan y asina hunto nos duna otro sosten pa por re-start nos economianan, crea perspectiva y mas resiliencia pa futuro.”

E parlamentario ta conlcui cu e sugerencia ta pa purba hiba reunionan y intercambionan mas frecuente pa por compronde e situacion di cada Pais y siña di experiencia di otro y con por juda otro mihor pa hunto surpasa e retonan cu entre otro COVID a presenta.

Comments

comments