iPhone 16 por incorpora un boton nobo cu lo revoluciona e experiencia di selfies pa su usuarionan, segun dato nobo revela dialuna p’e website 91mobiles.
E imagennan di e diseño di e proximo aparato di Apple lo brinda un idea mas cla di loke e fanaticonan di e marca por spera. E informacion difundi ta revela cu e iPhone 16 lo conta cu un boton nobo, denomina ‘Selfiebutton’, situa n’e banda drechi di e celular, bao di e powerbutton.
Ta spera cu e boton aki permiti e usuarionan saca potret y cuminsa cu videoclips facilmente cu un solo primi, siendo un alternativa n’e metodo tradicional di mishi e screen.
Dicho boton lo conta cu un funcion di touch cu ta detecta e tacto humano y responde na movimentonan specifico. Ora mishi cu e boton levemente, por ahusta e enfoke y zoom, mientras cu primiend’e completamente lo permiti saca potret of cuminsa graba video.
E imagennan filtra tambe ta sugeri cu Apple ta introduciendo cambio significativo den e configuracion di e camara patras. Ta spera cu e version standard di iPhone 16 tin dos lens di camara poni verticalmente, apartando di e disposicion diagonal presente den e iPhone 15.
iPhone 16, cu lo sali na benta na september, lo por converti den e ‘smartphone’ mas caro di Apple te cu e fecha. Aunke te asina leu no tin informacion precies, e informenan ta sugeri cu e lo supera e coto di iPhone 16, cu ta cuminsa cu 799 dollar p’e modelo standard y ta yega na 1199 dollar p’e Pro Max.
