E siman aki na IPA lo tene un open dag caminda lo duna tur informacion con pa sigui curso eynan. Esaki lo tuma luga dia 19 di November. Segun Jennifer Warner, vocero di e scol e open dag aki lo ta for di 10’or mainta pa 2’or di atardi y lo tuma luga na IPA mes. E dia ta consisti di diferente actividad. Lo tin entre otro presentacion di informacion general di estudio di maestro pa enseñansa primario. Riba Plaza Maybeline tur departamento y area di informacion lo tey presente pa asina duna informacion, pero tambe pa e publico presente mira kico tur IPA por haci. Banda di esaki studiantenan di e Conseho di Studiante di IPA y studiantenan di aña 3, lo organisa un food & bakesale. E conseho di studiante aki ta organisa esaki pa recauda fondo pa e proyectonan cu nan tin planea pa aña academico 2016/2017 y e studiantenan di aña 3 ta recauda fondo pa nan pasantia internacional cu lo tuma luga otro aña na Maart 2017. Lo bay tin oportunidad pa inscribi. Pa haci esaki mester trece papel di registro civil, esta e papel di 5 florin. Si a gradua caba, por trece copia di diploma di HAVO, VWO, MBO nivel 4 y e gastonan pa inscripcion ta 75 florin.
Banda di esaki, tur persona cu ta interesa pa haci e estudio di movecion y salud y estudio di Hulandes di segundo grado, pa pasa na IPA pa yena un formulario di interes. E estudionan aki lo cuminsa na aña academico 2018/2019. Pa mas informacion por tuma contacto cu Studenten Services na 5243100. Por bishita nan pagina di Facebook Instituto Pedagogico Arubano y tambe nan website www.ipaaruba.com.