IPA a dicidi en berdad pa cuminsa e aña aki cu un imagen nobo. Despues di un epoca di 25 aña cu a celebra aña pasa, a sinti e necesidad pa drenta un epoca nobo cu un imagen nobo, segun directora di IPA, Marilyn Richardson. Pa prepara e imagen aki a sali for di punto di bista di e vision riba enseñansa mes y a busca forma con por hinca esey bek den e imagen.
E imagen ta hopi colorido. Tin diferente color ta bin bek den esey y tambe tin cierto forma cu ta resalta un rato riba e parti di forma, cual ta un combinacion di un cuadra, y un circulo. Mirando cu e nificacion di circulo y cuadra, cual Richardson a splica.
E parti di circulo tin mas di haber cu un bista holistico. E tambe ta nifica cu conexion, comunidad y eseynan ta puntonan cu pa IPA den su vision riba enseñansa ta hopi importante. Tambe e parti di integridad ta importante. For di eynan cu e parti di circulo ta aden.
E parti di e vierkant tin mas di haber cu puntonan manera honestidad, confiansa, structura, cu tambe ta aspectonan cu awor aki den tur e desaroyonan cu ta bezig cun’e na IPA ta purbando di hinca e aspectonan ey mas hopi cu ta posibel.
E colornan ta hopi diverso. Esey por un parti tin di haber cu nos mesun comunidad tambe, cual ta uno hopi diverso y a scoge pa e colornan aki pa diferente motibo. Tin un parti cu ta oranje den dje. E parti ey tin di haber cu creatividad, cu e aventura, deseo. Pakico aventura y creatividad, ta e pregunta, pasobra ta wak cu enseñansa no mester keda para. Semper tin cu busca cosnan nobo, cosnan innovativo y ta wak esey den e parti ta resalta den oranje.
Tradicionalmente blauw ta mas pa sabiduria. Naturalmente IPA ta un instituto ta pa enseñansa, dus e parti di conocemento ta hopi importante. Pero blauw tambe ta un color cu ta inspira lealtad y amistad cu pa IPA den nan vision tambe ta hopi importante.
Tin un parti di dje cu ta geel. E color geel tin mas di haber cu intelecto, energia y briyo. Riba e tereno ey, ta trahando cu hobennan. Meta di IPA finalmente ta e hobennan na Aruba y a sinti cu e color geel ta refleha e aspecto di briyo cu ta wak cu mester resalta den enseñansa y naturalmente e color berde ta un color cu ta mas pa sostenibilidad. E tin un parti di harmonia y speransa tambe den dje.
Basa riba e vision di enseñansa, a yega na forma e logo aki y ta spera cu esaki lo keda como un inspiracion tambe pa un epoca cu ta biniendo, segun Richardson.
Pa IPA ta importante cu tur hende ta keda wak e bunitesa di e trabao di maestro. E ta un trabao sumamente importante y necesario y ta sinti cu mester tin hopi mas balor p’e. Di parti di IPA ta purbando awor aki tambe pa prepara e hobennan cu ta haci aplicacion pa bin IPA, pa nan berdad por cuminsa cu e opleiding. Mas hopi por cuminsa, mas hopi ta miho prepara pa esey, lo por garantisa un fluho mas grandi.
Esaki ta e opleiding cu generalmente ta pa enseñansa primario, pero tin diferente tipo di enseñansa cu lo mester haya mas atencion y den e parti ey Richardson kier bisa cu mester traha un tiki mas structura pa por planea e opleidingnan bon, pero tambe mester cooperacion di veld pa haci esey. Pasobra e instituto no ta e unico caminda cu ta forma e maestronan. E parti di practica ta hopi importante y si por cera hopi bon contacto cu complete veld cu por garantisa semper suficiente luga di practica, segun Richardson, por yega na mas maestronan pa Aruba tambe.
E ta sigui splica cu e uitval durante e opleiding mes no ta e problema asina grandi awor aki mas. E ta mas tanto uitval prome cu e opleiding, door cu tin cierto rekisitonan cu nan mester cumpli cun’e y pa e banda ey un di e bottlenecknan cu ta wak ta riba e tereno di matematica. Pa e parti ey a cuminsa for di e aña aki cu un otro aanpak, unda cu e guia tey for di un momento mas prome caba durante aña ora cu nan inscribi pa nan traha riba nan preparacion pa nan por haal e pruebanan di entrada tambe. For di momento cu un persona ta den opleiding, semper bo tin algun cu lo bisa cu nan a purb’e, toch e no ta algo p’e. Esey ta di respeta, ta sosode den tur tipo di enseñansa. Loke ta importante pa mantene si ta un bon cuido durante e opleiding. Bon atencion cu bo por sigui e studiantenan bon y tambe wak unda nan necesidadnan mas grandi ta y asina ofrece forma di guia pa nan por yega na completa e estudio tambe cu exito.
Semper IPA ta habri caminda pa nan wak kico eigenlijk e opleiding ta encera, pero ta sinti tambe ora publico bin, nan combersa cu e maestronan y cu e studiantenan cu tey, pa nan por haya un bon bista kico ta spera nan. Pasobra e ta keda si un tipo di opleiding cu bo mester tin ambicion p’e, bo mester tin e amor y dedicacion pa bo haci’e. Si bo no tin esey, e ta bay ta hopi dificil pa bo keda haci’e. Bo tin cu haci’e pa e razon corecto, Richardson a splica.