Comision organisador Torneo Spaans Lagoen, cu patrocinio di Fundacion Centro di Pesca Hadicurari den cooperacion cu Santa Rosa, ta invita tur piscado pa e reunion di capitan diasabra awor na Spaans Lagoen pa 8’or di anochi. Aki lo repasa tur regla y haci palabracionnan final pa e torneo na cual lo determina, ken ta e Rey (of Reina) di Djampou di Aruba.
Torneo pa sa ken ta Rey di Djampou:
Diadomingo 17 di maart 2019 otro siman, dia nacional di Himno y Bandera, Centro di Pesca Spaans Lagoen lo tin un Torneo di Pesca cu e meta di busca pa sa ken ta e Rey di Djampou di Aruba. Un torneo cu mas di 2500 florin na premio. Cu premionan atracivo pa e prome 3 lugar pa kilahe di djampou como tambe overall. Ademas di esaki, lo tin varios premio pa mayor ehemplar den e torneo, incluso mayor Djampou, Djampou hala hel, Conofes, Mulato, Picuda, Pisca Cora, Dorao y Brasi. Baranca Boat and Fishing Aruba ta pone un premio adicional pa e mayor ehemplar di djampou Rab’i Gay. E torneo ta di 4 di marduga pa 4’or di atardi y por cuminsa pisa di 2’or di atardi.
Reunion di capitan 16 di maart
Diasabra awor 16 di maart 2019 lo tin e tradicional di reunion di capitan na Centro Spaans Lagoen, unda lo duna tur regla y palabra e detayenan final. Inscripcion pa e torneo ta 35 florin pa participante y ta permiti un maximo di 4 piscado pa cada boto. E prome participantenan inscribi lo ricibi nan T-shirt atractivo, como tambe lo tin e oportunidad di participa den pot voluntario y varios premio di consuelo.
Dia di famia y bon ambiente
Publico en general ta keda cordialmente invita di awor caba pa un tremendo dia di famia festivo na Centro di Pesca Spaans Lagoen cu domino, un tremendo cushina, bar bon surti y musica crioyo bailabel pa un ambientoso celebracion. Diadomingo for di 10’or di mainta te 10’or di anochi, lo tin varios tent na e centro y por spera cu segun piscadonan yega, nan lo bende nan captura cu e publico presente. Yega tempran y reserva esun di bo. Bin pasa un rato ameno cu piscadonan riba bispo di nos dia nacional. Danki na tur e sponsor y voluntarionan cu a yuda, pa 5’or di atardi lo inicia cu e ceremonia oficial y entregamento di premio na e ganadornan. Djey lo sigui ambiente fiestivo cu musica bailabel. Un y tur ta bon bini