Ministerio di Cultura, Monumentenbureau y Comision Paseo Monumental ta promove nos Herencia Cultural en especial durante Paseo Monumental V, 2016.
Diadomingo awor, dia 11 di September, bo tin un cita cu “PASEO MONUMENTAL V, 2016”. E aña aki ta e di cinco edicion di Paseo Monumental. Monumentenbureau ta organisa e evento aki en cuadro di nos celebracion di 20 aña di aniversario. E Paseo Monumental ta cuadra cu e maneho di Minister di Cultura, sr. Otmar Oduber pa e cuido di nos monumentonan na Aruba y ta apoya e comision organisado. E cuido di monumento na Aruba ta consisti di Monumentenraad cu ta duna conseho na Minister, Stichting Monumentenfonds cu ta un fundacion cu ta encarga cu e parti financiero. Monumentenbureau ta e departamento experto riba tereno di monumento y ta encarga cu e maneho, ley di monumento, prepara y lidera restauracion y ta e centro di conocemento di monumento.
E comision Paseo Monumental V, 2016, ta consisti di sra. Indra Zaandam representando Ministerio di Cultura, sra. Anne Witsenburg reprensentando Stichting Monumentenfonds Aruba, sra. Daphne Every y sra. Carlisa Trinidad representando Monumentenbureau. E presidente di e comision ta e directora di Monumentenbureau, sra. Yvonne Webb-Kock. E Paseonan anterior a tuma luga na pia, pero e biaha aki lo ta bay rond di Aruba y ta organisa un carrally/speurtocht. E topico pa Paseo Monumental V ta”elementonan monumental unico na Aruba, manera adorno riba nos monumentonan, cas di cunucu, cas di torto, influencia di Neo-Barok estilo Latino-Americano, cas decora, grafnan di commandeur, forno di kalki y e estilo Art Deco y Nieuwe Bouwen. E actividad aki no ta posibel sin aporte financiero y e presidente sra. Webb-Kock ta gradici e main sponsornan Aruba Airport Authority NV, Aruba Bank NV y Aruba Tourism Authority.
Carrally/speurtocht
Bo tin cu yega entre 9or di mainta y te maximo 11or di mainta pa por participa na e carrally/speurtocht. Loke bo mester haci ta registra cerca nos na Schelpstraat dilanti Monumentenbureau y aki lo bo haya e buki di informacion hunto cu bo formulario cu 60 pregunta di e speurtocht. E buki tin informacion na Hulandes y e formulario tambe ta na Hulandes. E motibo cu a haci esaki na hulandes ta pasobra hopi mucha ta busca informacion pa scol cerca Monumentenbureau na Schelpstraat. E muchanan por usa e informacion di e buki pa scol. E actividad aki ta pa full famia, gruponan di trabao etc. Por core liber rond, por busca informacion riba internet of puntra amistadnan pa contesta di e preguntanan. Mester entrega e formulario completamenta yena na Monumentenbureau den Schelpstraat ente 4.00-5.30pm pa bin na remarca pa e premionan. E EVENTO AKI TA COMPLETAMENTE GRATIS.
E edificionan y obheto cu ta bay bishita den e rally ta Boegoeroei 18, Alto Vista 69, Bubali 119, Rachostraat e forno di kalki, Steenweg 17-19, Wilhelminastraat 58B, Wilhelminastraat 24, Adriaan Lacle blvd 8, Grafnan na Sero Patrishi, Santa Cruz 121, Kas Ariba 22, Macurima 161, Maciarima 154, Sabana Basora 17, Savaneta 50 y B. v/d Veen Zeppenfeldt 77. Tur e edificionan ta identifica cu e bandera di Paseo Monumental.
Premionan
Lo tin premio sumamente atractivo pa tur ganadornan di speurtocht. En conexion cu e 20 aña di Monumentenbureau lo tin 1 premio pa cada aña di existencia cu ta suma e total di 20 premio. E premionan lo ta: 1, 2 pasashi pa Santo Domingo cu Insel Air Aruba. 2, 2 pasashi pa Medellin Colombia cu Insel Air Aruba. 3,Weekend Stay na La Cabana. 4, Kayak Adventure package pa 4 persona incluyendo snorkeling y cuminda di Aruba Outdoors Adventure. 5, Horseback trip pa 4 persona na Rancho Notorious. 6, Atlantis Submarine pa 4 persona di De Palm Tours. 7, Full day pass pa 4 persona riba De Palm Island. 8, Dinner pa 3 persona na Faro Blanco Restaurant. 9, Glass bead making workshop pa 2 persona di Terrafuse. 10, Sunset sail pa 4 persona cu Jolly Pirates. 11 y 12, Paintball adventure pa 4 persona di Hot Triggers Paintball. 13, Dinner pa 4 persona na Moomba Beach.14, Lunch pa 4 persona na Aquarius Restaurant. 15, 2 lane pa 2 ora na Eagle Bowling. 16, Gift Certificate pa Cilo Restaurant. 17, Gift Certificate pa the Cinemas na Renaissance. 18, Gift Certificatre pa Pizza Hut. 19, race pa 4 persona cu Bushiri Karting. 20. Tickets pa 4 persona pa the Cinemas na Renaissance.
E ganadornan lo keda anuncia den nos medio di comunicacion y riba nos Facebook Page cu ta “Monumentenbureau”. E ganadornan di e speurtocht lo wordo invita pa ta presente y pa ricibi nan premio. E premionan lo wordo entrega den e siman di 19-23 di September 2016.
Presidente di Comision, sra Yvonne Webb Kock ta gradici tur e sponsornan pa nan premio bunita aki.
Celebracion atardi
For di 4:00 PM pa 6:00 PM lo tuma lugar e clausura di Paseo Monumental V, 2016. Bar y cushina lo ta bay ta bon surti y e musica ta den man di e bandanan popular manera Buleria y N’Fuzion.
Parkeo
Riba diadomingo por haci uzo liber di e sitionan di parkeo den Playa. Ta recomenda e sitio na unda tabata ex-texas of e sitio na Arubus cu ta esunnan mas cerca.
Bin participa y celebra cu nos di Monumentenbureau “Paseo Monumental V, 2016”. Paseo Monumental V ta cuminsa pa 9.00 di mainta y ta termina pa 6:00 di atardi den Schelpstraat. Pa mas informacion bay riba nos facebook page: monumentenbureau of yama Monumentenbureau na nr. di telefon, 583-5938.