For di fuentenan fededigno nos di masnoticia.com a ricibi informacion cu un team Hulandes hunto cu investigadornan local a keda cla pa cu e investigacion pa loke ta conoci den boca di pueblo como e “Tereno Gate” di Gabinete Mike Eman I y II. Manera ta conoci ta hopi ta e personanan cu durante e ocho añanan di Gabinete Mike Eman I y II a wordo previlegia den gran forma y a ricibi cantidad grandi di tereno djis pa nan “yudansa” of nan “fieldad” pa cu e partido berde. Hopi a cuestiona e actonan aki pasobra ta bon conoci tambe cu tin lista largo di hende cu tin añanan ta wardando riba nan papelnan keda cla p’sina nan ricibi nan tereno y asina traha nan cas, pero otronan “directamente liga” cu e partido berde y na e minister di e ocho añanan ey, djis via un simple yamada of sms of whatsapp tabata keda cla y tabata djis pasa busca nan papel of hasta bay asina leu cu te hasta e bode di Gobierno tabata trece esakinan te na nan cas. Hasta tabatin bendemento di tereno cu djis algun minuut prome nan a ricibi y awendia algun di e personanan aki tin “miedo” pa bini Aruba bek pasobra nan sa bon bon cu nan a comete fechorianan cu terenonan di Gobierno y cu na momento cu nan pisa suela Arubano, nan lo wordo deteni como sospechoso di “TERENO GATE!!!!Wel shonnan e investigacion a finaliza y nos a compronde cu e resultado ta den man di minister di Infrastructura caba. Mester menciona cu e investigacion aki a saca na luz di dia cu tabatin hopi iregularidad y manipulacion cu tereno di pueblo y esaki sigur ta acto di condena mirando cu e minister en cuestion e tempo ey, tabata apoya y aproba e forma di traha aki. Nos a purba tuma contacto cu Minister Otmar Oduber, encarga cu Departmento di Infrastructura y Planificacion pa haya sa su opinion riba e asunto aki pero no a logra ja cu nos a wordo informa cu e ta den reunion cu su conseheronan y e diferente directornan di departamento pa canalisa e resultado di e investigacion aki. Si mester bisa cu no ta un investigacion facil pasobra ta hopi hopi tereno a wordo duna den forma fraudulento.