Diamars anochi un melding ta drenta cu un avioneta lo a cay na Gavilan. Ta trata aki di un avioneta piper 38, cu a sali for di Sto. Domingo, diamars den oranan di atardi. Segun declaracionnan di e dos pasaheronan, fuel lo a caba cu nan. Tin tur indicacion cu e piloto a coy e ruta mas largo, pa cual fuel ta caba mas lihe tambe.
E avioneta Piper aki por bisa cu a casi intacto despues di e accidente. Riba combinacion di fotonan cortesia di pagina di Facebook di Aruba Drones, saca diaranson mainta por mira claramente con e avioneta aki a keda despues cu el a cay den mondi na Gavilan. E investigacion di parti di autoridadnan lo mester saca afo kico precisamente a pasa cu a pone cu e avioneta a bin abao.
Anteriormente e avioneta aki a sali for di Las Americas (Sto. Domingo) diadomingo, dia 16 di februari direccion Miami. Diamars atardi nan ta sali for di Miami pa Sto. Domingo, pa despues bin Aruba.
E tipo di avioneta aki, 38-112 Tomahawk ta un avion di dos persona (un asiento pa piloto y uno pa un pasahero) cu tin su tren di aterisahe fiho y tin un solo motor. Otro pilotonan cu a yega di bula den avionetanan similar for di Sto. Domingo pa Aruba, e distancia tabata di 500 miya, pero cu nan a yega Aruba rond di 480 miya. Pero den e caso aki, ta kere mas sigur cu e avioneta aki lo mester a desvia pa nubia y tambe e biento fuerte cu tabata tin e ultimo dianan.