Relaciona cu e investigacion di e atraco riba diamars 13 di September den un cas na Wayaca, lo siguiente.
E investigacion ta wordo hiba pa un ekipo special di recherche, cu ta bao guia di un fiscal. E ekipo di TGO aki (Team Grootschalig Onderzoek) ta keto bay trahando riba forsa maximo. Husticia a hasta laga trece un experto for di exterior pa haci investigacion tecnico riba telefonnan.
Ta existi indicacionnan fuerte cu un di e dos sospechosonan cu a wordo deteni, ta esun cu a los e tironan. Tambe tin indicacion cu e persona cu a tira, no a actua su so. Pesey cu tanten, e otro sospechoso ta wordo investiga pa complicidad.
E investigacion a hiba alabes na detencion di un bendedo di arma di candela. No ta existi te awor ningun indicacion cu e sospechoso aki lo ta envolvi den e plannan pa e atraco.
Hues-comisario a dicidi tocante detencion di tur tres sospechoso.
E investigacion no ta cla ainda. E ekipo ta bezig cu scucha varios testigo, en especial pa haya mas claridad tocante e motibo di e atraco. Ta trata di un caso hopi serio, den cual a cay un morto y un herido.
Ministerio Publico y Cuerpo Policial di Aruba ta hopi satisfecho cu e cooperacion, cu te awor a hiba na resultadonan rapido y bon.