E maneho na Aruba ta dirigi pa promove creacion di alimento localmente. Den cuadro di esaki por a constata cu tin hopi entrepreneurs hoben tumando e direccion aki, segun ing. Haime Croes, director di DIP.
Nan a bin ta tuma nota cu tin masha hopi interes pa terenonan pa cultivo y tin varios entrepreneurs cu a cumpli cu nan rekisitonan y a haya e terenonan caba na nan disposicion. Esnan interesa mester tene cuenta si cu pa Vertical Farmers, e greenhousenan, DOW tambe mester duna “bouwvergunning”.
Loke ta un tendencia aworaki ta vertical farmers, greenhouse y chickenfarmnan. Ta kere cu lo bay tin hopi peticion pa esaki den futuro.
E areanan unda esakinan ta concentra mas tanto ta na Butucu, un parti na Savaneta, Kibaima y Noord. Mayoria di nan ta den produccion di berdura y, na opinion di Haime Croes, esaki ta un mercado hopi grandi. E inversionistanan ta bisa cu nan ta concentra riba lechuga, tomati, melon, y patia, pero tin mas otro tipo di prodccion. E ta un bon forma pa ta menos dependiente di exterior, ademas cu ta protege e divisanan tambe.
Den mayoria di greenhouse y chickenfarm ta huurgrond pa cinco aña. Si cumpli, lo prolonga esaki y de lo contrario lo hal’e aden. Ampliacion di tereno ta posibel, y si no tin espacio ta move nan pa otro area.