Durante e ultimo 7 añanan (casi 8 aña) di gobernacion bou di e signatura berde, esta di AVP, e minister encarga cu husticia a logra hopi pa e departamentonan cu ta resorta bou di su cartera. Asina mes cu financieramente no tabata tin mucho recurso disponibel, e mandatario a haya un balance apropia pa por a reparti e poco fondonan disponibel, entre tur su departamentonan. E ministerio aki di husticia, cual ta un cartera hopi pisa, den e sentido cu, mayoria di e departamentonan gubernamental ta cay directamente bou di esaki. Esaki nifica tambe cu esaki ta e cartera cu mas tanto trahadornan ta resorta bou di dje. Pesey e no ta un tarea facil, pa purba na tene tur departamento contento na e mesun momento, ora cu no tin mucho espacio financiero pa por haci esaki. Un di e departamentonan di mas grandi y cu ta rekeri di hopi inversion continuamente manera Cuerpo Policial, ta un ehempel bibo di loke cu ta wordo referi na dje. Desde cu Gabinete Mike Eman a tuma Gobierno over y a asigna mr.drs. Arthur Dowers como minister encarga cu e cartera di husticia, e mandatario a dedica grandemente na analisa e problemanan cu e cartera aki tabata tin y a constata cu bou di miembronan di diferente departamento incluyendo KPA, tabata desmotiva pa varios motibonan. Un di e problemanan mas grandi tabata e scarcedad di polis. Esaki debi cu entre 2001 pa 2009, e minister anterior di husticia bou signatura geel esta di MEP, pa mas di 3 aña, no a recluta ningun polis nobo pa drenta den servicio. Esaki ta nifica cu den e tres añanan aki, un promedio minimo di 60 persona no a bira polis y banda di esaki Cuerpo Policial tabata conoce desde 1986, un deficit di 150 polis caba te cu 2009, ora cu minister Dowers a bira minister di Husticia. Banda di esaki naturalmente no por lubida cu cada aña, tin varios polis cu ta baha cu pensioen y otronan cu ta pidi overplaatsing. Pesey mes cu e reto pa cu e departamento gubernamental aki so, tabata un reto hopi grandi pa contraresta e problematica existente. Pa por contraresta e problema y recluta polis nobo, nifica cu mester inverti sumanan cuantioso y pa cual motibo mes tambe strategicamente a haci esaki. Mientras tanto mundo ta keda bira cada bes mas moderno y Aruba tambe cada bes ta conoce desaroyonan positivo, cual ta trece cu ne cu e demanda pa siguridad tambe ta crece. Esaki ta algo normal den un pais cu ta den desaroyo continuo segun tur experto. E titular di Husticia ta kere fielmente cu e trabou desplega door di inverti hopi den training nan profesional y capacitacion den e totalidad di miembronan di cuerpo policial, a y keto bay ta dunando e resultadonan positivo. Esaki no nifica cu automaticamente nos ta cla y cu mester stop di enfoca den e progreso continuo di nos cuerpo policial. E intencion ta, pa nos keda inverti den e miembronan directamente pa nan por specialisa nan mes y di e forma aki nan por duna ainda mucho mas miho servicio tambe na nos comunidad.