E docentenan di klasnan 3 y 4 a atende recientemente un workshop organisa pa Ministerio di Enseñansa y Departamento di Enseñansa pa introduccion di e metodo nobo y innovativo di rekenen/wiskunde, esta Wereld in Getallen. Aña pasa a introduci e programa aki den klasnan 1 y 2.
Docentenan nobo di klas 1 y 2 cu no a atende e workshop aña pasa a participa e aña aki tambe. Entre nan tabatin Judmilla Boekhoudt, kende ta duna les den tweede klas na Sint Paulusschool. Aña 2016/2017 ta Juffrouw Judmilla su prome aña para dilanti klas y trahando cu e metodo nobo. El a observa cu e tayer tabata hopi interesante y aunke el a lesa ful e pakete caba, toch tabatin topiconan manera con pa registra e muchanan y cierto partinan di e contenido di e programa cu e tabata kier sa mas di dje. E ta di opinion cu e metodo ta uno hopi “kindvriendelijk”, pues facil pa muchanan traha cune.
Juffrouw Judmilla Boekhoudt a splica cu den e buki ta hopi cla cua partinan ta pa e docente haci hunto cu e muchanan (pagina blanco) y tin paginanan cu un fondo cora cu ta indica cu e esaki ta partinan unda cu e muchanan ta traha nan so. El a gusta cu e metodo ta indica informacion cu e docente a duna caba y ta laga e muchanan mes traha independientemente. Tambe, el a menciona cu tin diferente tipo di buki pa traha cune, cual ta yuda e muchanan hopi den nan siñamento.
Un juffrouw cu mas aña di experiencia dilanti klas, esta Juffrouw Monique Coronel di Colegio Laura Wernet Paskel, klas 3, tambe ta hopi contento cu e workshop, como cu e buki ta hopi diferente di loke nan a traha cune te awo. E ta haya e structura di e buki atractivo y ta bisa cu ta importante como docente pa sa con pa traha cu e metodo pa dia y pa siman y kico ta e metanan cu mester alcansa pa cada cuater siman di les.
Juffrouw Monique ta haya e cantidad substancial di momentonan di practica importante, como cu e ta duna oportunidad pa drecha e partinan cu e mucha tin dificultad cune. Ademas, e ta gusta cu muchanan por traha mas lihe tin e oportunidad pa traha riba nan habilidadnan tambe cu e metodo.
Wereld in Getallen ta ofrece extra tareanan pa caba den un siman y ta yuda cu e parti di disciplina, Juffrouw Monique ta splica; y e ta haya cu e parti di remediering cu ta inclui den e programa tambe ta hopi bon y pues ta yuda e alumnonan riba cada nivel yega e meta di habilidadnan di e programa.