Diahuebs awo dia 2 di Maart, International School of Aruba lo tene un anochi di informacion di e programa General Education Development (GED) cu nan lo ofrece na tur studiante y adulto interesa. E anochi di informacion lo ta di 6:00pm pa 7:30pm y lo tuma luga na International School of Aruba na Wayaca 238A. Durante di e anochi di informacion lo duna tur informacion relevante over di e programa cu lo inicia na augustus proximo.
Manera anuncia recientemente, Gobierno di Aruba conhuntamente cu International School of Aruba a formalisa e acuerdo pa lansa e programa GED Aruba. Un programa di preparacion y un serie di test internacionalmente reconoci na nivel di enseñansa secundario cu ta conduci na un certificado cu credencial ekivalente na un U.S. High School Diploma.
Mientrastanto ta ofrece e GED® test na mas cu 60 pais rond mundo y awo a certifica International School of Aruba como e prome Authorized Education Provider (AEP) den region, unda cu lo ofrece conhuntamente cu e examennan un programa completo di preparacion y guia hunto. Pa por cualifica como GED Authorized Education Provider e instancia mester cumpli cu diferente rekisito incluyendo experencia amplio cu e sistema y curiculo di High School Mericano y cu e idioma di instruccion Ingles. GED ta reconoci pa un cantidad grandi di College y Universidadnan na Merca, Canada, den region y na Aruba mes como ekivalente na un High School diploma.
E GED program lo inicia na Augustus 2017 y tin un capacidad promedio di 200 studiante pa aña. Lo ofrece e programa den oranan di anochi na International School mes. E programa di preparacion y examen ta consisti di e materianan “Language Arts – Reading”, “Language Arts – Writing”, “Math”, “Science” y “Social Studies”. E edad minimo pa aplica pa e GED program ta 17 aña y mester tin nacionalidad Hulandes of prueba di residencia na Aruba pa un minimo di 5 aña. Tur studiante cu aplica mester mustra suficiente “English Proficiency”. Lo test esaki na comienso di e programa unda cu lo ofrece tambe un programa di guia.
International School of Aruba a desaroya un website unda cu tur informacion di e GED program ta wordo publica. E website aki ta www.gedaruba.com . Tur interesado por registra via di e website pa keda na altura di tur informacion y updates.
Tur interesado ta keda cordialmente invita pa diahuebs awo dia 2 di Maart pa 6or di atardi na International School of Aruba. Durante di e anochi di informacion lo duna informacion amplio riba e GED program. Tambe lo tin oportunidad pa haci pregunta riba e contenido y organisacion di e programa y lo tin oportunidad pa inscribi durante e anochi aki.