Proximamente AZV lo tene su prome Health Fair, pa cual ya caba nan a cuminsa cu’n campaña online. Sr. Joost van der Kamp, Relacionista Publico di AZV ta amplia mas ariba esaki.
E campaña ta encera cu hendanan por cumpra carchi online y por mira cu esaki tin un bon acogida. Ta bezig ta haciendo radiotour, dunando entrevista, pa mustra cu tin un evento grandi na caminda. Tur hende lo ta bon bini. AZV ta den comunicacion cu polis y brandweer, pa keda monitor si e luga ta yen, cu no ta forma peliger, mirando cu lo tin bandanan presente.
El a expresa su satisfaccion pa e tremendo acogida cu e evento aki ta hayando, ainda tin hende ta bin ta cumpra carchi na AZV of via online, y nan ta spera un bishita masal di pueblo cu ta interesa den haya mas informacion pa un bida mas saludable.
Docternan cu ta bay duna charla y otro profesionalnan di salud cu ta bay dicta tayernan di trabao ta cla pa haci esaki, pa haci control di salud, of duna informacion, entre otro riba CVA y Diabetes, entre otro malesanan cronico.
Un di e metanan ta pa e poblacion sera conoci di mas cerca cu AZV cu ta e instancia cu ta paga e gastonan curativo, manera ley ta stipula, y tin cierto cosnan cu ta limita, segun van de Kamp. Den e marco unda nan ta traha AZV ta haci su maximo esfuerzo den locual ta posible, pero no tur cos ta posible, sr. van de Kamp a expresa.
Tur esaki por wordo splica durante e evento aki, unda nan ta habri espacio pa ta den combersacion cu nan clientenan cu ta tur persona biba na Aruba.