Recientemente a tuma luga e e Business Week 2019 di Directie Economische Zaken, cu a hiba como titulo “Conquering New Horizon” (Conkistando horizontenan nobo). Esaki a tuma luga den e siman di 13 pa 17 di mei. Sra. Sharon Meijer, di Direcrtie Economische Zaken, seccion EXPRODESK ta splica mas ariba esaki.
Sra. Meijer a cuminsa ta splica cu e seminario aki tabata mas bien pa entrepeneurnan den e industria creativo, pero tambe e sector di servicio profesional. Nan a haya diferente topico den e siman aki. Nan a cuminsa cu E- commerce, unda cu nan a haya diferente informacion, tur loke ta trata wordpress, di con pa nan mes diseña nan website simpel, pa esunnan cu no tin. Y tambe tabata tin posibilidad pa esunnan cu tabata kier, por a bende nan producto online. Tambe nan a haya e topico di belasting, pagonan online, trademark, etc. Tur loke ta importante pa un negoshi ora e ta bay online, ora e ta bende su producto, con pa proteha esaki tambe. Pasobra cu unabes cu bo potret of bo logo, slogan ta ariba website, bo mester proteha esaki tambe.
REACCION
Pa loke ta e reaccion, tin un necesidad grandi bou di e entrepeneurnan, e-commerce ta uno hopi pidi, como tambe ‘taxation’, Directie Economische Zaken por bisa cu despues di 1 of 2 dia, nan tabata full geboek.
E seminarionan aki ta hala atencion tambe di esunnan cu tin hopi aña den negoshi, y nan ta wak con internet ta algo importante den e era aki, 2019.
Pa loke ta E- commerce tabata tin personanan di postkantoor cu tabata interesa den e workshop di E- commerce, pero tambe personanan cu tin negoshi den e formato tradicional, pero cu awo kier bay digital. Tabata tin diferente artista presente, den diferente sector. Tin artesano, tin musiconan, pero tambe tin diferente personanan cu awo lo kier start nan mes negoshi.
SIGUIENTE STAP
E siguiente stap ta bay ta na juni, lo sigui den e parti di logistica, e ora lo wak kico ta e posibildiad, cu unabes un hende cumpra bo producto, cu realmente e producto por yega na su destino y tambe e gastonan envolvi, ya cu esey na Aruba tin cierto limitacionnan, cu si no haci’e den consodilacion of un warehouse na Merca, e ora e gastonan por ta un tiki halto. Lo tin un workshop di esaki, cu’n consultant cu lo bin di afo, cu lo yuda e personanan aki, con pa guianan con pa exporta.
E participantenan a tene un conferencia via Skype, unda nan partner na Hulanda, RVO, a contesa diferente pregunta y tambe a brinda nan servicio y e posibilidadnan di diferente voucher y subsidionan cu e RVO ta brinda na entrepeneurnan di Aruba. Esaki tambe tabata forma di e mainta di informacion.
PARTICIPAION NA WORKSHOP
Den industria creativo tin participantenan cu ainda no a establece nan negoshi. Personanan asina tambe ta welcome. Unabes cu nan kier bira un negoshi, lo pasa nan pa otro unidad di Directie Economishce Zaken, cu ta IDEA, cu lo duna guia den e proceso. Y unabes cu nan ta asina leu, nan por bay ariba e website di DAZI.com. Nan por haci un afspraak ora ta asina leu, unda cu nan por bin y habri nan negoshi. Y despues di esey, si nan kier sigui amplia, nan lo pasa pa EXPRODESk y lo busca otro alternativanan pa nan, sea exportacion of wak otro mercadonan, unda cu nan lo sigui crece nan negoshi. Por bisa cu e idea cu e persona tin, te na establece su negoshi, te pa crece na Aruba, te pa bay pafo di Aruba, DEZ ta cana cu e persona durante full e trayectoria aki. Y unabes e persona ta den exterior, via RVO, tambe via nan Embahadanan rond mundo, e persona aki nunca lo ta su so. Den full e trayectoria e lo tin informacion y guia y mane ta bisa semper den e workshop, informacion y guia ta completamente gratis. Te asina leu, Sra. Sharon Meijer, di EXPRODESK, di Directie Economische Zaken.