Proximamente lo tuma luga na Republica Dominicana un evento comercial grandi, HUB Camara Santo Domingo, na cual varios compania di Aruba lo participa. Sr. Edward McCollum, vice consul y responsabel comercial di Republica Dominicana na Aruba, ta splica mas di e evento aki.
E evento aki lo tuma luga for di dia 5 pa 8 di maart y ta esaki ta bay ta su di 4 edicion. Aña pasa Aruba a participa cu 13 compania den diferente area di cierto productonan, di F&B tambe. Tin algun cambio e aña aki, caminda cu e actividad aki lo wordo organisa na un manera mas profesional. Tur producto cu no ta F&B, ni ciga, es decir cu tur producto cu ta wordo manufactura na Republica Dominicana, di manufacturacion industrial, farmaceutico, construccion, servicio, tecnologia, lo haya exposure di nan producto.
Durante e evento aki, dia 5 di maart, lo bay tin e metodologia di B&B, unda cu ta sinta cu esunnan interesa, cual agenda ta cla caba. Lo bay sinta cu e compania cu ta fabrica un producto na Republica Dominicana, cual lo por exporta e producto. P.e. tin cierto material di construccion di cierto tecnologia nobo, p.e. un blokki of un klinker pa esunan interesa pa haya sa si e tecnologia aki ta disponibel caba na Republica Dominicana.
For di Aruba e interes pa e evento aki ta grandi. Tin basta material cu ta wordo uza na Republica Dominicana, cu ta wordo uza caba na Aruba. Actualmente tin 12 compania registra caba pa e evento na Republica Dominicana, di cual dos di nan ta basta conoci na Aruba cu ta bay pa e evento aki. Y ya caba Sr. McCollum ta haciendo e contactonan na Republica Dominicana.
HUB Camara Santo Domingo aña pasa a wordo teni na e mesun luga, Hotel Embahador y ya caba tin hende ta bolbe bay e aña aki. Tin incentivo di parti di gobierno Dominicano, unda cu nan ta cover 3 anochi di hotel cu e comerciante Arubiano no mester paga. Y despues di cumpli cu e agenda di HUB di B2B, lo bay haya 300 dollar cash back, esey ta pa persona, pa compania. Si kier bay cu mas persona, toch ta un persona so lo haya e 300$ cash back (tur cos paga).
Tin basta interes pa haci negoshi cu Republica Dominicana di parti di varios pais Europeo, incluyendo Hulanda. Ta keda na e comerciante Arubiano pa opta pa bay Republica Dominicana pa haci negoshi na Republica Dominicana.
Sr. McCollum a sigui bisa cu e aña aki tur cos ta bayendo mas rapido cu dos aña pasa, unda cu tabata tin hopi sceptismo. Esey ta hopi menos e aña aki. E HUB mes ta di 5 pa 8, pero Sr. Mc Collum lo kier bay cu e grupo, incentivando pa bay te cu dia 10, pa bay un tiki mas aden, bishita e facilidadnan di fabrica, di dos compania grandi, un showroom cu ta e mas grandi di area di Caribe, di casi 4 mil m2 di beyesa di diferetne cosnan cu por wordo treci Aruba y esey ta un miho cos.
Tin hende ta tumando Republica Dominicana hopi na serio, segun Sr. Mc Collum. E Dubai Ports World Wide a anuncia un inversion nobo di 800 miyon dollar pa ampliacion di e waf cu ya a costanan 240 miyon dollar. E salida di Republica Dominicana ta straight pa Aruba. Y e ta yega mas lihe, den 2 dia. Antes, p.e. Inclusive via aereo, e ta yegando practicamente tur dia for di Sto. Domingo. Y e ta posibel. E no ta algo facil, pero ta algo cu kier a logra.
Tin hopi productonan manera productonan cu ta wordo fabrica na Republica Dominicana cu ya ta obtenibel na Aruba.
Recien Sr. Mc Collum a ricibi un email di fabricantenan di productonan farmaceutico/medicinal, cu ta manera branch di companianan farmaceutico grandi Canades, cu ta fabrica na Republica Dominicana y kier cuminsa exporta pa Caribe. Pa inscribi pa e HUB aki por tuma contacto cu Sr. Edward Mc Collum na telefon 737 – 9292.
Tambe por subi e Facebook Page Comercio Dominico Arubiano pa mas informacion. Tin hopi posibilidad di haci negoshi cu Republica Dominicana. Tin companianan Arubiano ta lantando nan negoshi na Punta Cana. Republica Dominicana ta brinda nan e oportunidad aki. Lo bay tin hopi oportunidad di comercio entre Aruba y Republica Dominicana.