Despues di simannan di deliberacion Interact Club of Aruba a ehecuta nan prome proyecto cu exito. E miembronan di Interact a dicidi cu nan prome proyecto lo ta pa yuda Casa Cuna. Asina un paar di siman pasa a tuma lugar e coleccion di comestibel, pampers, “baby wipes”, juice y cuminda di baby pa Casa Cuna. E coleccion a tuma luga na Ling & Sons na unda cu comunidad di Aruba por a cumpra di articulonan indica y deposita esaki cerca e miembronan di Interact.
Diasabra ultimo un paar di miembro di Interact a hiba articulonan colecta na Casa Cuna. Na Casa Cuna nan a haña un rondleiding di e luga y tambe un historia cortico di Casa Cuna. Despues di esaki e miembro nan di Interact a pinta cu e muchanan cu tabata presente den weekend na Casa Cuna.
Interact Club of Aruba kier a gradici comunidad di Aruba pa a contribui na e bunita proyecto aki. Alavez kier a duna un danki tambe na Ling & Sons pa e oportunidad pa colecta. Tambe un danki na Compra Ltd. pa nan donacion di Frisian Flag. Por ultimo un gradicimento na Rotary Club of Aruba pa nan sosten.