Prome minister di Slovakia, Robert Rico, ta den estado critico, despues di a wordo tira diaranson, segun e minister di interior di e pais, Matus Sutaj Estok.
E minister a haci e declaracion aki durante un rueda di prensa conhuntamente cu e minister di Defensa Slovaco, Robert Kalinak.
E prome minister a wordo ataca cerca di e edificio caminda cu el a reuni diaranson cu e miembronan di su gobierno. Inicialmente a informa cu el a wordo herida den su pecho y abdomen y tabata den estado grave. El a wordo hiba den helicopter na un hospital di e ciudad di Banska Bystrica.
E supuesto tirado, un homber di 71 aña, a wordo tira riba vloer pa polis mientras cu e tabata purba di scapa for di e sitio. Juraj Cintula, autor di e atake, a bisa cu el a hacie pasobra e no tabata di acuerdo cu e politica di e gobierno Slovaco.
