“Mi por confirma cu tin un empleado di KIA deteni. Pero mas informacion of detaye awor aki ta imposibel duna. E investigacion ta den man di Polis y no tin di haber cu KIA mes”, asina Rocco Tjon, Director di Korectie Instituut Aruba (KIA) a confirma diahuebs despues di publicacionnan den prensa. E ta respeta e proceso y den espera di resultado di e investigacion cu ta andando, unda lo mester bin claridad cu si e empleado ta culpabel of inocente.
Rocco Tjon a declara cu den KIA mes, manera ta e custumber y di acuerdo cu protocolnan, ta percurando pa tur medida reglamentario ta na su luga y ta implemente, speciamente pa ora cu un empleado cay cera y yega e momento cu ta manda e detenido pa KIA.
Tjon ta subraya cu cada funcion den KIA ta uno di confiansa y ta trece responsabilidadnan grandi cune. E caracteristica “Integridad” ta na top di e lista di rekisito y exigencianan pa cada persona cu ta traha den KIA y cu KIA.
Concluyendo, Rocco Tjon a bisa, cu KIA ta coopera cu e investigacion te asina leu cu ta toca e institucion y no ta duna mas informacion ni declaracion te cu e investigacion ta conclui.
Korrectie Instituut Aruba, KIA a muda pa su localidad na Santo di Patia na San Nicolas dia 22 di September 1990, pues 26 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas of menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.