Un forma nobo di insulina oral, cu pronto por purba riba humano, por wordo administra como alternativa na inyeccion of e spuitnan di insulina.
E cientificonan a desaroya un forma di suministra insulina oralmente, a traves di un capsula of chuculati sin sucu y nan a purba esey cu exito riba animal. E insulina nobo aki lo ta cla pa purba riba humano na 2025. Aproximadamente 61 miyon di persona ta sufri di diabetes na Europa y entre 5% y 10% di nan tin diabetes di tipo 1, loke ta nifica cu mester administra nan insulina tur dia pa controla nan nivel di glucose den sanger.
Algun persona cu diabetes tipo 2, mas comun, tambe mester di insulina. Segun e Federacion Internacional di Diabetes, e tres formanan mas comun di administra insulina cu hangua, pen of inyeccion.
Administracion di medicamento den e higra
E investigadonan di e Universidad di Sidney, den colaboracion cu e Universidad Artico di Noruega, a descubri anteriormente cu tabata posibel administra medicamento den e higra mediante nanotransportador. “Nos a haya un subvencion na Australia pa studia varios manera di administracion di e remedinan aki n’e celnan di un poblacion mas bieu. P’esey nos a uza nanoremedi. Asina ta nos a cuminsa uza e puntonan cuantico, algun material increibel,” Nicholas Hunt, profesor titular di Universidad di Sidney a splica Euronews Next.
E puntanan cuantico ta particula masha chikito semiconductor di algun poco nanometer di grandura. “Ora nos a uza nan pa prome biaha, nos a mira cu nos por administra remedi di forma hopi eficaz. Por a controla nan cu precision na ki parti di curpa nan a bay. Nan no tabatin efecto no desea y nan tabata realmente eficaz,” el a añadi.
E idea di crea un forma oral di insulina a surgi despues cu un dokter geriatra di un clinica cu cual e investigadonan ta traha cu ne, expresa nan preocupacion p’e adultonan mayor hospitalisa, cu tabata aumenta e riesgo di infeccion secundario, ya cu nan tabatin mester inyeccion di insulina.
“Naturalmente, e ora ey solamente e tabata un concepto. Y e pasonan clave cu nos a dal despues tabata, na prome luga, valida cu por a administra insulina oralmente,” Hunt a splica. E ekipo mester a desaroya un polimero special diseña pa pasa door di e stoma, wordo absorbi den e tripa y yega n’e higra.
Nan a propone diseña un polimero pa responde n’e nivelnan di sucu den sanger di e pashent, loke nan a logra observando e enzymnan cu ta kibra e moleculenan largo di sucu. “Si tin un cantidad halto di glucose den sanger, tin un cantidad halto di e enzymnan aki y e ora ta degrada e polimero y despues ta libera e insulina,” Hunt a splica. Asina e organismo por elimina rapidamente e nanomaterial.
“E forma aki di administra insulina ta mas precies pasobra e ta hiba rapidamente n’e zonanan di e curpa cu mas tin mester. Ora cu administra e insulina cu un spuit, e ta plama door di henter e curpa, caminda cu por causa efecto secundario no desea,” Peter McCourt, di e Universidad Artico di Noruega (UIT), a splica.
Plan pa futuro test clinico
E sistema aki a test riba raton, djaca y baboon y e ekipo a publica su resultadonan den Nature Nanotechnology. E baboonnan no tabata kier a bebe e pildonan, asina ta cu e investigadonan a purba cu gel y chuculati sin sucu y e baboonnan a prefera e chuculati crea den laboratorio. “Ora cu nos a haci nos estudio cu e baboonnan, nos a hacie di un manera caminda cu e tabata diseña a imita loke lo a haci den fase I di e test clinico. E mesun dosis di insulina y e mesun paradigma experimental,” Hunt a detaya.
Actualmente, e atencion ta enfoca riba e fabricacion di e proximo test clinico, cu e speransa cu e cuminsa na final di e aña. Hunt ta afirma cu ta spera pa efectua e testnan despues di 2026, loke, si tin exito, por pidi e aprobacion di e organismonan regulador mes pronto cu 2028. “Nos ta spera cu un terapeutico cu por tuma oralmente y algo cu nan no por sufri un overdosis… permiti un miho control di glucose a lo largo di henter e ciclo vital,” Hunt a afirma, kende a agrega cu e insulina ingeribel no mester ta den Frigidaire y ta sigui ta rendabel.