Manera ta e caso tur aña na inicio di aña escolar nobo, IBiSA a reuni cu su instructornan di deporte na school. Den e encuentro informativo pa trata diferente aspecto y preparacion, e instructornan a expresa nan deseo pa por haya un oportunidad di actualisa nan conocemento den instruccion di deporte na scol. IBiSA na su turno a haci e preparacionnan necesario pa esaki tuma luga.
Tur instructor di deporte escolar den servicio di IBiSA a bin hunto pa intercambia idea con pa duna les den diferente ramo di instruccion di deporte na school pa klasnan 4, 5 y 6 di Enseñansa Basico. E encuentro a tuma lugar riba diahuebs 6 di October 2016 na Compleho Deportivo Simeon Antonio. Durante e mainta a tene varios sesion di deporte cu un duracion di 30 minuut cada un. Den cada sesion, 1 of 2 instructor tabata dirigi y/of coordina, mientras cu e otro instructornan a participa activamente na e deporte.
A inicia cu e parti di ‘warm-up’ cu a consisti di 3 tipo di ehercicio. Despues a sigui cu e deportenan cu a keda presenta. E escogencia a bay pa e deportenan cu ta riba e calendario di competencia escolar di e aña aki, entre otro: Futbol, Volleyball, Atletismo, Basketball y Handbal. Na final tambe a duna 3 ehercicio cu por uza pa ‘cooling-down’. Cada instructor mester a tene cuenta cu e meta di les. Esaki a encera e intensidad di e les, e nivel y edad di e grupo di mucha cu ta haci e les y tambe e preparacion y organisacion riba veld cu mester wordo haci prome pa e les ta comprendibel.
E mainta a cera cu e parti di evaluacion cu tabata na encargo di sr. Edgar Erasmus y Candido Tromp, mientras cu e instructornan tambe a participa den forma di duna nan ‘feedback’. E participantenan a sali contento y satisfecho di un mainta hopi activo, unda cu a duna tur lo necesario pa actualisa conocemento y mehora e parti di instruccion di deporte na scol. IBiSA ta desea tur instructor di deporte escolar hopi exito den nan trabao.