Mirando cu tin hopi hende kier yuda y subi caya pa haci algo pa e problema aki, a puntra Sra. Trudy Hassel, di Plataforma Ley di Cacho, kico ta e planes di plataforma pa atende e problema aki. E ta amplia mas ariba esaki.
E plataforma a yama un reunion, unda un total di 15 organisacion a bin hunto a cuminsa papia pa sinta traha ariba dje. tabata tin hopi entusiasmo pa esaki y ya caba ta bay tene un otro reunion, unda lo yama tur hende hunto. Lo traha un plan strategico integral pa asina pidi, naturalmente, no solamente gobierno pero tambe instancianan priva, cu tambe mester cuminsa carga cierto responsabilidadnan, pa logra resolve cierto problematica.
Turistanan ta haya e casonan di Aruba no solamente bergonsoso y lamentabel, pero dado momento, e sector ey, unda cu hopi hotel ta contribui cu e proyectonan aki. Pero tin mas hotel cu tin cu join in. Esaki ta un joint- effort segun Sra. Hassel.
Pakico busca un puppy y ora e ta asina chikito e ta tutu. Asina cu e bira grandi, cu mester dun’ e atencion, e ora ta bin cu yen di excuse. Mester pone prioridadnan cla, kico ta mas importante. Un cacho of un pushi ta miembro di bo famia, bo ta lag’e sin un luga di biba, pa e doño bay lastra den weekend. Esey ta cosnan basico cu mester papia over di dje.
Mas aleu, Sra. Hassel a sigui bisa, cu ora cu tuma decision den bida pa tuma un cacho of un pushi, e ta un responsabilidad te ora cu e animal muri. Den pasado e Plataforma a acerca gobierno unda cu nan a wordo priminti un cierto suma, te cu nan a cuminsa prepara pa con pa ehecuta un plan pa e bestianan ariba caya. Lastimamente, esaki no a bay door. E promesa a keda na promesa, Sra. Hassel a finalisa bisando.