Inspectie Volksgezondheid Aruba (IVA) a haci un bishita na ‘Fundashon Hospice Atardi’ cu lo ta e prome hospice na Aruba. E hospice lo duna pashentnan cu un malesa terminal un luga trankil unda nan por pasa nan ultimo tempo di bida hunto cu nan famia. E meta di e bishita tabata pa IVA ser conoci cu e miembronan di e fundacion, wak e edificio cu ainda ta den renobacion y pa duna conseho a base di e rekisitonan cu tin den e Ley di Calidad di Cuido y e Ordenansa Nacional Cas di Cuido.
E team di Cure and Care di IVA a sinta cu e individuonan cu a tuma e iniciativa encuanto e fundacion; dr. Peter Paul Hermans y dr. Benita Croes. Tambe a sinta cu sra. Natalie Rietman di Cruz Cora cu ta un di e instancianan cu ta sostene e proyecto aki. E hospice ta situa na e ex cas di Ho Sing Loi na Cura Cabai 147 y tin planea pa habri su portanan na november 2018. E co-fundadonan a comparti nan mision y vision, nan manera di traha y a indica cu nan ta uza e liñanan di maneho den cuido paliativo di Hulanda: pallialine. Na inicio lo tin luga pa un maximo di 7 pashent, lo tin un enfermera presente 24/7 y banda di esey lo tin varios boluntario di Cruz Cora cu lo asisti e clientenan bou guia di Dr. Benita Croes, cu ta specialisa den cuido paliativo. Dr. Peter Paul Hermans, presidente di e fundacion, a splica cu e idea ta pa e clientenan ta confortabel y pa trece e atmosfera di cas mas cerca di e hospice cu ta posibel. Esaki ta nifica por ehempel cu e famia di e clientenan mag prepara cuminda den e cushina comunal y mag di keda drumi tambe cerca e ser keri.
Pa IVA, e focus ta riba e calidad di cuido cu ta wordo duna na e hospice. Pues, ta importante pa e fundacion tin nan permiso regla prome cu nan habri, cu nan tin un bon plan di maneho y cu nan a pasa control di diferente instancia gubernamental manera Brandweer, DTI y Dienst Warenkeuring en Hygiëne. IVA tabata hopi satisfecho cu e bishita y lo haci un bishita atrobe na fin di oktober pa duna cualkier conseho final prome cu e fundacion habri oficialmente.