Seccion Examenbureau di Departamento di Enseñansa Aruba ta informa tur persona cu ta interesa pa aplica pa e Prueba di Naturalisacion cu inscripcion ta habri entrante diamars dia 1 di augustus 2017. E Prueba di Naturalisacion ta tuma luga dos biaha pa aña.
E prome ronda di inscripcion pa aña 2017 tabata na luna di Januari, mientras cu e di dos ronda lo ta na luna di Augustus.
Inscripcion pa e di dos ronda ta tuma luga entre diamars dia 1 di augustus te cu dialuna dia 21 di augustus 2017. Pa aplica pa e Prueba di Naturalisacion mester haci uzo di e formulario di aplicacion cu ta obtenibel pa download for di riba e website Enseñansa Aruba [www.ea.aw]. Aki tambe por haya e foyeto di informacion.
Prueba di Naturalisacion desde 1 di Januari 2011 ta consisti di 1 componente di conocemento di nos comunidad y structura estatal, 4 componente di idioma Papiamento y 4 componente di idioma Hulandes.
Departamento di Enseñansa Aruba pa medio di su Examenbureau
ta encarga specificamente cu e prueba y no tin ningun participacion den henter e proceso di naturalisacion. Pa informacion relaciona cu e Prueba di Naturalisacion por tuma contacto cu Examenbureau, mientras cu pa naturalisacion mester tuma contacto cu Gabinete di Gobernador di Aruba.
Pa mas informacion por acudi na website [ea.aw] y buska Naturalisatietoets of Prueba di Naturalisacion den e alfabet menu.
Tambe por sigui e desaroyonan a traves di facebook page @educationaruba.