Den un desaroyo remarcabel den Partido Alternativa Real (PAR), e miembronan furioso y desilusiona a exigi claridad di e directiva di partido tocante e maneho di e ex-minister y actual miembro di Staten, Zita Jesus-Leito. Segun informadonan den partido, e motibo ta e yamada controversial di lider di partido Quincy Girigorie na Jesus-Leito pa entrega su asiento, despues cu anteriormente el a dicidi pa no postula su mes como candidato pa e eleccionnan di Staten di 2025.
E yamada aki y e supuesto presion riba Jesus-Leito a causa un tremendo malestar entre e miembronan di PAR, kende ta sinti cu tin un falta di respet pa un persona cu a tene un papel importante pa e partido.
E miembronan di PAR a insisti riba un reunion di conseho di partido y un reunion general di e miembronan pa discuti e situacion relativo na Jesus-Leito y pa haya e claridad necesario. Nan ta expresa nan desilusion tocante e maneho di Girigorie y ta critica e falta di respet pa e contribucionnan di Jesus-Leito na e partido.
Aunke Jesus-Leito ta den recuperacion di un intervencion kirurgico y ainda no a reacciona riba e peticionnan di su lider di partido, e peticion pa transparencia den e partido ta crece. E miembronan ta exigi un splicacion y un reunion tocante esaki ta parce inevitabel.
Mientras e liderato di partido ta bisa cu nan ta trahando pa organisa e reunion demanda, e asunto ta keda un batata cayente den PAR. Tur esaki ta sosode contra e background di un reorganisacion y rebranding anuncia di e partido, unda Girigorie kier introduci idea nobo y cara nobo mirando bista n’e eleccionnan di 2025.
E situacion relativo na Jesus-Leito y PAR ta pone na claridad e buraconan hundo den e partido y ta planta pregunta tocante liderazgo, respet, y e direccion futuro di PAR. Cu e promesa di un reunion prome cu fin di luna, e miembronan y e interesadonan ta hala su aliento pa loke ta bin den e periodo tumultuoso den e partido geel.