Minister di Husticia, sr. Andin Bikker, ta elabora riba e tempo cu lo dura pa trece ley di ID pa autoridadnan por haci mas control.
E idea ta pa trece un ley cu ta exigi ciudadanonan tin un ID cu nan p’asina nan por identifica nan mes ora nan wordo para pa control, cual lo optimalisa e trabou di control y siguridad. E Minister ta splica cu un aspecto ta personanan cu ta encarga cu supervision pa controla e ley di Admision y Expulsion (LTU) tin e derecho pa dentro di puntra tur persona pa nan ID. E Minister tin entendi cu na Parlamento tin un ley di iniciativa cu ta bay introduci un ID plicht cu no lo enfoca solamente den control di personanan ilegal, sino control general. Un ID plicht ta haci cu personanan tin e obligacion pa cana cu un ID y asina por identifica nan mes na autoridadnan sin ningun problema. Pronto Parlamento lo presenta e ley di iniciativa aki y nan ta den e espera di esaki.
Minister Bikker ta mustra cu si Parlamento presenta e iniciativa aki mas pronto cu ta posibel, e proceso aki por cana mas lihe.