Ing. Ryan Falconi di N.V. Elmar e siman aki a controla e sistema di coriente riba e mata solar cu a instala na entrada di Plaza Padu na Oranjestad. E structura ademas di bunita, tin hopi otro funcion pa publico. Den ‘Siman di Sostenibilidad’ cu nos ta aden awo y siguiendo cu e vision di Gabinete Mike Eman, ta oportuno pa trece dilanti aspectonan special di otro proyecto cu Gabinete Mike Eman II ta implementando na beneficio di comunidad. Den e caso di e ‘Mata Solar’, esaki ta un cooperacion cu N.V. Elmar y Utilities Aruba N.V.
“Cu e proyectonan di visibilidad cu nos ta haciendo, nos ta buscando sostenibilidad tambe,” ing. Falconi a splica. Den e caso aki, e ‘Solar Tree’ tin shete panel solar cu tin un total di 1.4 kilowatt di capacidad. E intencion tras di esaki ta pa e ta auto suficiente, kier men pa cubri su propio uzo di energia pa recarga aparatonan mobil, pa e watercooler traha y brinda WiFi. E energia extra cu e ta produci ta programa pa bay riba e red di N.V. ELMAR mescos ta cu e caso di Parke Solar di Aeropuerto Internacional Reina Beatrix, panelnan solar riba daknan di scol y otro edificionan publico rond di nos isla.
E ingeniero Arubiano a splica cu semper ora ta busca ekiponan di afo, ta busca pa nan specificacion ta uno cu ta sigura cu e producto por resisti e caracteristicanan particular di nos medio ambiente. Adicional na esey, N.V. Elmar tambe ta tene cuenta cu e reglanan di construccion publico y cu mester wordo aproba dor di otro departamentonan di gobierno prome cu su instalacion. Tur esey a tuma luga caba.
E modelo di e ‘Mata Solar’ ta basa riba e mata Acacia cu ta haya den desierto y ta hopi similar na nos mata di kwihi. Esey ta un di e motibonan pakico a scoge pa busk’e for di Israel for di unda a tuma mas of menos dos luna pa yega. Ademas di e funcionnan ya menciona, e tin tambe luznan LED cu ta cende automaticamente den oranan mas laat di atardi.