Tanto Ministernan como Departamentonan di Gobierno concerni tabata hopi pendiente na momento cu horcan Matthew a pasa cerca di Aruba, pero tambe e dianan despues ora cu a experencia lama hopi bruto.
Prome Minister Mike Eman, hunto cu Minister di Infrastructura Benny Sevinger y director di DOW ing. Marlon Croes, a bishita hotel y beachnan cu a wordo afecta den e ‘aftermath” di Matthew cu a pasa panort di Aruba. Ing. Croes a splica cu Aruba a sali practicamente ileso di e mal tempo y e daño cu a mira tabata na e beachnan, principalmente for di e area di Bushiri te cu Manchebo. Na e sitionan aki e beachnan a bay por completo. Por a constata tambe cu entre Divi Tamarijn y Tamarijn mientrastanto cu e santo a cuminsa wordo manda bek, pero tin areanan cu tin baranca y falta hopi santo. Esaki ta parti di loke naturalesa a causa.
Di otro banda, director di DOW a splica cu funcionarionan di su departamento a bin ta haciendo hopi trabou di limpiesa na e beachnan for di diabierna te cu dialuna. E pronosticonan tabata cu pa diaranson atardi Aruba lo no sinti e efecto mas di e “swelling”. Na e caretera di Malmok pa Arashi tambe DOW tabatin basta trabou di limpiesa pa haci, ya cu cu hopi piedra, yerba y strea di lama a wordo tira te riba e caminda.
E ciclonnan cu Aruba a yega di pasa aden a demostra cu despues di cada mal tempo cu pasa, naturalesa mes ta restaura su mes. Pues no tin daño ireparabel haci, pero Aruba ta depende di e pilar turistico pa cual mester percura pa e beachnan ta operacional mas lihe posibel. Naturalesa ta tuma normalmente 2 siman pa restaura e areanan cu a sufri daño, pero DOW a saca un man pa yuda naturalesa, haciendo un gran parti di limpiesa.