Sigur e servicio cu SVB tin online, ta uno positivo. Esaki ta comentario di director di e banco di seguro, ing. Edwin Jacobs.
E ta sigui splica cu e servicio cu ta habri oficialmente awor aki den luna di October cu ta e posibilidad pa notifica AO mediante nan website, a tuma e rumbo aki pa motibo cu den 2016, e seguro di malesa y accidente a conoce un desaroyo basta impresionante cu e consecuencia cu e cantidad di aseguradonan a aumenta drasticamente. Tin dos motibo pa esaki. Primeramente na Januari di e aña aki, e cooperacion cu Dimas a drenta den un otro fase caminda cu ta controlando pa Dimas si e personanan cu tin permiso di trabao ta registra na SVB, pasobra nan tin e obligacion pa ta registra. E prome resultadonan cu tabata tin a mustra cu un grupo grandi di personanan cu tin permiso di trabao pa traha na Aruba, no ta registra na SVB. Te cu diahuebs, tin mas of menos 2200 peticion cu a drenta pa controla, di cual 25%, mas of menos un 550 persona cu mester ta registra na SVB pa motibo cu nan tin e permiso di trabao aki, no ta registra.
Esey ta trece cune cu e grupo aki mester wordo incorpora tambe den SVB. Por mira cu e cantidad di aseguradonan a crece. Banda di esey, e proceso di reforma cu a inicia aña pasa, caminda cu a haci e diferente adaptacionnand en seguro, pa asina e seguro aki por bira sano atrobe, entre otro un di e medidanan aki a aumenta e premieloongrens, e salario maximo di seguro, cu a trece mas of menos 2800 trahado cu no tabata sigura pa seguro di malesa, pero si pa accidente, a pasa e ora pasa pa seguro di malesa. Banda di esey, Parlamento a pasa un amienda den e ley di reforma, unda cu a duna SVB e autoridad pa por inparti multa na doñonan di trabao cu ta haya cu no ta cumpli of no a cumpli cu ley di malesa, ta sigura nan trahadonan, a pone cu un grupo grandi di trahado cu no tabata sigura anteriormente, a pasa segura.