Natalee Holloway a desaparece na Aruba despues di un anochi di salimento riba 30 di mei 2005. Te dia di awe e desaparicion di Natalee tin su impacto.
Autoridadnan hudicial di Aruba (Cuerpo Policial di Aruba, instancianan di investigacion y Ministerio Publico di Aruba) lo investiga tur tips serio cu drenta cu lo por hiba na clardidad den e caso aki.
Na mei 2022 e periodista Mericano G.C. van Susteren a publica via social media cu e ta dispone di informacion importante cu cual lo por soluciona e desaparicion di Natalee.
Pesey mes cu RST (recherche samenwerkingsteam) en cooperacion cu FBI a start na juni 2022 un investigacion bao guia di Ministerio Publico di Aruba.
E investigacion aki tabata dirigi principalmente riba e pregunta si e informacion cu señora Van Susteren ta dispone di dje, ta asina concreto y corecto cu en berdad e lo por hiba na solucion di e caso.
Lamentablemente e informacion no a aporta na soluciona e desaparicion di Natalee.
Lo contrario, e investigacion a mustra cu Van Susteren a bira victima di estafa y manipulacion di probablemente personanan for di Sur-America cu kendenan e tabatin contacto y kendenan a gañe cu informacion falso, en cambio pa pago.
Por ehempel, Van Susteren a haya un paki via post desde Colombia cu tabata contene sapato y paña cu segun e afzender lo tabata pertenece na Natalee.
Sinembargo, despues di investigacion forensico di FBI a resulta cu e ADN haya den e paki no tabata cuadra cu ADN di Natalee y tampoco di Joran van der Sloot.
Hasta e sapato a resulta di tabata di un marca falsifica cu alavez muy probablemente a wordo fabrica apenas na 2019.
Van Susteren a ricibi ademas varios foto y video. Investigacion di e fotonan y videonan a mustra cu aki tambe ta trata di manipulacion y estafa.
E fotonan di supuesto personanan envolvi den desaparicion di Natalee por ehempel, tabata bin di un pagina habri di Facebook.
Otro fotonan, manera di e wesonan humano cu segun e afzender lo tabata restonan mortal di Natalee, a resulta procedente di Internet. Un di e fotonan aki, por ehempel, a wordo saca for di un articulo di corant di 2018 tocante un dump na Costa Rica.
E investigacion a mustra tambe cu no tabata trata di varios fuente independiente cu tabata conta e mes storia. Tur e personanan cu a acerca Van Susteren ta parce di ta lia na otro.
Autoridadnan a palabra anteriormente cu Van Susteren, cu e lo wordo informa personalmente y ampliamente tocante resultadonan di e investigacion y e contenido di e investigacion.
Sinembargo, señora Van Susteren a bisa dos biaha caba cu e lo no desea ningun presentacion di e team investigativo tocante e topiconan aki.
Awe a informele por escrito den un carta tocante e resultadonan di e investigacion. Cu mayornan di Natalee tambe a busca contacto.
