Diamars mainta, riba peticion di lider di Fraccion di POR den Parlamento, Marisol Lopez-Tromp, minister di Enseñansa tabata presente den Sala di Parlamento durante un ‘vragenuur’ pa contesta 5 pregunta di e parlamentaria, specificamente riba e escasez di cambernan pa nos studiantenan di Aruba cu bay studia na Hulanda, basa riba declaracionnan di minister Plenipotenciario na Hulanda. Un situacion cu ta preocupante y mester di atencion.
Mester bisa cu minister Besaril a acompaña minister Lampe den sala di Parlamento y a contesta tambe e preguntanan haci pa Lopez-Tromp.
E 5 preguntanan haci ta e siguientenan:
- Ki pasonan Minister di Enseñansa ta bay tuma atraves di Directie Onderwijs pa nos studiantenan cu lo bay studia na Hulanda den futuro por ta na tempo pa haya un camber y sigura un camber prome cu nan yega Hulanda? 2. Na ki forma Minister tin pensa pa mehora e procedura di aplicacion pa nos studiantenan di Aruba? 3. Kico ta Minister su plan pa percura cu ningun di e studiantenan aki ta keda sin un camber ora nan inicia nan estudio na Hulanda?
- Minister por splica kico tur e studiante mes por haci delanta prome cu e bay studia pa sigura cu e tin su lugar pa biba prome cu su estudio inicia? 5. Considerando cu e cantidad di studiantenan internacional na Hulanda ta creciendo y cu ta premira cu lo bay tin escasez di como 40.000 camber pa studiante na Hulanda, ki preparacion ta andando actualmente pa cu e tema aki na Departamento di Enseñansa y na Arubahuis?
Ambos minister presente a duna un splicacion amplio riba e situacion actual pa loke ta trata studiantenan di Aruba cu ta sigui nan estudio na Hulanda y con nan ta mira e desaroyo di esaki tanto na nivel local como na Hulanda mes.
Un punto cu a resalta ta e declaracion di minister Lampe, kende a bisa cu en bes di wak e situacion aki como un problema, por wake mas bien como un oportunidad nobo pa educacion superior na Aruba. Mirando e escasez y aumento di prijs di camber na Hulanda por stimula nos studiantenan pa sigui nan estudio den e region y na Aruba mes cu e consecuencia cu un Universidad di Aruba, un Instituto Pedagogico y un EPI mester bay converti nan mes den un ‘Distance Learning Organization’ y ta trahando riba esey awor aki. Ora logra esaki, hopi di e estudionan cu tradicionalmente mester a bay Hulanda físicamente pa bay studia eynan, via e concepto di Distance Learning Organization físicamente por ta na Aruba y studia y haci diferente di e estudionan na Hulanda.
Mientras tanto, pa loke ta studiantenan cu ta bay Hulanda, ya caba for di augustus Departamento di Enseñansa, Arubahuis y minister Plenipotenciario a cuminsa publica diferente articulo den medionan local riba e echo cu ta urgente pa ta na tempo pa busca un camber of cas, cual ta un responsabilidad di cada studiante y su mayornan. Naturalmente gobierno atraves di Departamento di Enseñansa y Arubahuis ta coopera den e buskeda aki, pasobra esaki ta fundamental pa por sigui e estudio na Hulanda.
Minister Besaril di su banda a bisa cu e parti primoridial ta informacion, entre mas trempan duna e informacion na e studiantenan miho lo ta pa nan y esaki no ta solamente pa loke vivienda, pero tambe e estudio cu nan ta elegi y e parti financiero.
El a cuminsa na duna informacion ya caba na e klasnan di voorexamen, esaki pasobra e promedio di espera pa bin na remarke pa haya un camber na Hulanda ta 2 aña. Di otro banda tin otro fenomeno, nos studiantenan ta haya camber, pero ora wak kico nan a haya, manera un camber di 3×3 y cu nan tin nan toilet, pero cu tin cu comparti baño y cushina, nan ta bisa cu nan no ta tume. Esaki ta bira otro problema, pasobra pa haya un camber tipo studio ta tarda y ta costa hopi placa. Minister Besaril a bisa cu ta preferibel pa cuminsa chikito y pone nomber riba lista pa den un 2 aña por bin na remarke pa un camber cu ta mas na smaak di e studiante.
Importante tambe ta pa mustra nos hobennan cu tin mas lugar pa studia na Hulanda cu no ta solamente Amsterdam, Rotterdam, Den Haag, Utrecht y Groningen. Gran mayoria ta bay e lugarnan aki, siendo cu tin e mesun tipo di estudio na otro ciudadnan, unda cu ainda lo por haya camber y na un prijs mas accesibel. No mester lubida cu Hulanda a bira un di e paisnan mas atractivo pa bay studia, specialmente ora a tuma e decision di haci e educacion 50-50 Ingles-Hulandes.
Na e momentonan aki pa busca un miho solucion pa e studiantenan ta mercadeando informacion na tur nivel pa preparanan bon y por triunfa na Hulanda.
Parlamentaria Marisol Lopez-Tromp a gradici e splicacion di e ministernan pa loke ta e escasez di cambernan na Hulanda y con ta atendiendo cu esaki for di awo caba, unda e parti di información ta hunga un rol primordial.