Informacion falso di Serlimar circulando den comunidad di Aruba

Serlimar kier informa comunidad di Aruba cu tin informacion falso cu ta circula di Serlimar. Clientenan residencial actualmente ta hayando bishita di otro compania di coleccion di desperdicio caminda nan ta wordo mal informa cu Serlimar pronto lo bai sera su portanan. Alabes e personanan aki ta wordo ofreci pa yena un formulario di cancelacion di Serlimar pa asina sera contract cu otro compania. E formulario di cancelacion aki no ta valido si esaki no wordo procesa conforme cu e procedura di cancelacion na un oficina di Serlimar mes. Serlimar kier pone enfasis pa esnan cu ta wordo aserca dor di otro compania cu informacion falso y e formulario di cancelacion aki, pa por fabor no yena esaki. Si como cliente, ta desea di scoge pa ricibi servicio di otro compania, por pasa libremente na un di nos oficinanan caminda e proceso di cancelacion lo tuma luga na e forma corecto. Serlimar ta lamenta tipo di accionnan asina aki cu tin e meta pa stroba Serlimar di progresa, pero nos ta spera cu e informacion aki yega na tur esnan cu a wordo mal informa y perhudica. Si abo ta un di e personanan aki cu a wordo mal informa y a yena e formulario aki, por pasa libremente na un di nos oficinanan, bin cu e copia di e formulario aki cu a wordo yena pa asina nos por procesa bo deseo debidamente. Si ta desea di comunica cu un persona directo, por yama libremente na ‪524-5080 y splica e motibo pakico ta yama. Un biaha mas nos ta pidi comunidad di Aruba pa sea alerta na e bishita cu bo ta ricibi di otro compania na bo cas y sea alerta di e informacion cu ta wordo duna na bo persona. Y sea informa cu ningun formulario di cancelacion cu ta wordo provee door di otro compania no ta valido y no lo wordo accepta na nos helpdesk como un cancelacion valido. Pa cualkier informacion of pregunta cu bo por tin por fabor tuma contacto cu Serlimar of pasa libremente cerca nos.

Comments

comments