Con bo ta prepara bo mes pa studia na Hulanda? Con ta haci escogencia di estudio corecto? Y cu kico mester tene cuenta cu ne si ta trata di presupuesta? E preguntanan practico ey tabata para central den e informacion cu Stichting WeConnect Aruba a duna recientemente na Colegio Arubano na Playa. Mas di dies examenklas di HAVO y VWO a haya un curso intensivo.
Necesidad
E hoben profesional Judeska Alleyne, economista-di- negoshi gradua, ta biba y traha na Hulanda y a regresa su isla natal Aruba pa algun luna. E tabata motiva pa duna informacion na su scol bieu, Colegio Arubano. Rector y decanonan a mustra entusiasmo. Manager di WeConnect Tanja Fraai: “Nos a propone pa Judeska bishita un mainta; a bira tres mainta cu informacion pa 11 di e 15 examenklasnan; e necesidad a resulta hopi grandi”.
Confiansa propio
Judeska a haci un presentacion cu presidente di WeConnect sra. Paula Kibbelaar, docente na IPA. E ta mira tras cu satisfaccion: “E studiantenan di Colegio por a mira nan mes den e storianan, conseho y experencianan di Judeska, recien graduado, pa motibo cu e tabata reflexiona di manera practico y yen di humor, y tabata comparti directamente na Papiamento su experiencianan como studiante, di su amigonan, compañeronan di estudio y como mentor, cu e grupo di futuro studiante aki.” Kibbelaar ta agrega, como president di WeConnect Aruba, cu e tabata contento di tabat’ey presente. “Aunke ta mas di 30 aña pasa cu mi tabata asina hoben y a regresa Hulanda pa studia, tin algun experiencia cu ainda ta identico y reconocibel.” WeConnect Aruba a apoya e sesionnan di informacion aki cu hopi placer y compromiso, pasobra cu e grupo aki ta forma e futuro marco profesional y intelectual pa nos comunidadnan. E decanonan di Colegio Arubano a describi e importancia di e tipo di informacion aki di e siguiente manera: “E studiantenan a ricibi informacion di un persona cu tabata studiante y cu por a papia cu nan na Papiamento. Tabatin un grupo di studiante cu a sigui papia cu ne basta rato despues di e presentacion, solamente pa por expresa nan inseguridad y gana poco confiansa den e gran paso aki”.
Exito den estudio
WeConnect ta continua cu su afan pa reduci e cantidad di drop out di studiante Arubiano y Antiyano na Hulanda. Esaki e fundacion ta haci mediante varios proyecto, curso di capacitacion y reunionnan entre Hulanda y e islanan. Ta wak si e informacion proporciona pa WeConnect Aruba por continua tambe den institucionnan educativo na e isla. Paula Kibbelaar: “Ta den interes di nos tur cu e tempo di estudio den exterior sea un exito; un bon preparacion, tanto practico como mental, ta un factor clave. Pero tambe realisacion di esaki, y ta p’esey WeConnect ta facilita e actividadnan aki-cu eventualmente bo por regresa.”