Den e di tres kuartal di 2023, produkto- i servisionan di konsumo na Boneiru tabata 1,9 % mas karu ku un aña anterior. Den e di dos kuartal inflashon tabata 4,6 porshento. Na Sint Eustatius preisnan a baha ku 1,1 porshento riba base anual den e di tres kuartal. Den e di dos kuartal preisnan a subi ku 3,3 porshento. Na Saba inflashon tabata 2,8 porshento den e di tres kuartal. E kuartal anterior esaki tabata 5,2 porshento. CBS ta indiká esaki a base di e índise di preis pa konsumidó na Hulanda Karibense.
Preis na Boneiru a oumentá ku 1,0 porshento kompará ku e kuartal anterior
Kompará ku e di dos kuartal di 2023, preisnan na Boneiru a subi den e di tres kuartal ku 1,0 porshento. E subida aki prinsipalmente ta kousá pa transporte; e preis di pasashi di avion a subi den di tres kuartal ku 15,0 porshento kompará ku e kuartal anterior. Ademas, preis di paña i sapatu a subi ku 2,8 porshento. Preis di kuminda a subi ku 1,0 porshento den e último kuartal kompará ku e kuartal anterior.
Durante e kuartal aki e subida ta wantá, kompará ku e kuartal anterior, dor di gastunan di elektrisidat, ku a baha ku 14,2 porshento debí na un bahada di e tarifa variabel di elektrisidat for di promé di yüli.
Preis na Sint Eustatius ta 1,6 porshento mas abou kompará ku e kuartal anterior
Preis pa konsumidó na Sint Eustatius a baha den e di tres kuartal di 2023 ku 1,6 porshento kompará ku e kuartal anterior. E bahada e kuartal aki prinsipalmente ta kousá pa un bahada di preis di elektrisidat. Meskos ku na Boneiru, aki tambe e tarifa variabel di elektrisidat a baha for di promé di yüli. Transporte tambe a bira mas barata, e preis di pasashi di avion a baha ku 3,9 porshento. Gasolin a bira 7,6 porshento mas barata i diesel a baha ku 20,0 porshento kompará ku e kuartal anterior.
E preis pa paña i sapatu a konosé un subida, e produktonan aki a subi e kuartal aki ku 9.4 porshento.
Preis na Saba 0,8 porshento mas haltu ku e kuartal anterior
Na Saba, produktonan di konsumo tabata un promedio di 0,8 porshento mas karu den di tres kuartal di 2023 kompará ku e kuartal anterior. Preis di paña i sapatu a subi ku 6,5 porshento i pasashi di avion tabata 7,3 porshento mas karu. Produkto pa mantenshon di kas a baha na preis ku 6,0 porshento kompará ku e kuartal anterior. Ademas, preis di elektrisidat a baha ku 8,0 porshento dor ku den e kaso aki tambe tabatin un bahada den e tarifa variabel.
Sifranan provishonal
E sifranan durante e di tres kuartal di 2023 ta provishonal i lo finalisá esakinan na momento ku publiká sifranan di e di kuater kuartal di 2023.
Fuentenan:
StatLine – Hulanda Karibense
