Ministerio di Turismo/Cultura conhuntamente Departamento di Transporte Publico y Aruba Tourism Authority a duna presentacion na grupo di representantenan di asociacion id taxi, companianan di tour y autobusnan cu tin permisonan specialmente dedica y enfoca riba San Nicolas como nan destinacion final. Ministerio di Cultura a duna presentacion relaciona cu e diferente desaroyonan cultural, pero tambe diferente puntonan di interes cu tin na San Nicolas cu ta hopi abundante. A presenta un lista amplia cu varios punto y asina mes a keda cu diferente punto cu por a elabora riba dje. A trata diferente tema manera sitionan di interes, sitionan cultural y tambe sitionan unda cu lo por come of bebe y bay beach.
“Ta enfocando tur esfuerso pa pone San Nicolas riba e plataforma di ta un ciudad di herencia cultural, ta ripara cu hopi di e elementonan tey caba y djis falta e identificacion. Hopi biaha e local ta esunnan cu ta mas consciente di kico por haci y awor ta djis cuestion di tin e traspaso di informacion aki pa e personanan cu ta bin den contacto cu turista, pa asina por duna nan e experiencia autentico”. Segun sr. Zaandam a sigui splica, tin hopi posibilidad pa diversificacion di locual cu ta wordo ofreci na turista. Ora ta papia di “island tours” aworaki lo enfoca riba e asina yama “Heritage tours” tournan cultural direccion pa San Nicolas.
Mario Arends a toca e tema di kico ta e deseo di e turista cu ta bin cu crucero, pasobra esaki at e segmento turistico cu ta duna mas, pa por haya e tipo di feedback necesario pa wak con ta e miho manera pa presenta e tour di San Nicolas. Tambe e turista di crucero semper ta busca autenticidad y diferente experiencia relacion cu cuminda, aventura y relaciona cu e parti artistico. Sr. Arends a duna amplio splicacion di locual por adkeri na e gusto di turista y companianan grandi cu ta traha cu nan.
Ministerio ta wak e importancia den traha y colabora hunto den un forma hopi estrecho y pa tin un plan integral den esaki. P’esey a trece dilanti diferente estudio cu a wordo haci hunto cu ATA pa mustra cu e plan tin un strategia figo y tambe informacion figo den e caso akinan. Aworaki ATA lo bay crea 3 standard tour cultural, uno cortico di 3 ora y dos largo di 5 – 6 ora pa asina ofrece e diferente hendenan den e sector di transporte pa asina nan por ofrece diferente tour cultural pa San Nicolas. Tambe a papia di e posibilidad pa ofrece training esencial pa esunnan cu ta den contacto cu turista y cu ta den e sector di transporte pa asina nan tin informacion uniforma y corecto ora ta trata di Aruba y nos Herencia. Lo keda informa tur hende di e desaroyonan aki, sr. Zaandam a termina bisando.