Indra Zaandam, representando Minister Otmar Oduber, a lustra cu nan ta hopi contento di a ricibi invitacion di ATIA pa duna un presentacion tocal e ley di prohibicion di foam y plastic. Mester bisa cu e ley aki lo bay na vigor otro aña y mester bisa cu Aruba ta laat riba e aspecto aki pa motibo cu Aruba tin un problema grandi caba riba e aspecto di desperdicio. Tin sushi riba nos isla, tin un forma pa deshaci di esaki pero aworaki no tin un forma mas efectivo y adecuado pa deshaci di sushi y tampoco e ta sostenibel. Hunto cu e sector comercial por coopera pa drecha esaki y ta esey ta loke e sesion serca ATIA kier duna informacion ariba. Zaandam a mustra cu nan ta duna informacion riba e ley aki p’asina nan sa tur kico y con e ley ta.
Pero tambe pa splica e comunidad comercial cu tin un aña di prueba p’asina ricibi feedback di e comunidad comercial p’asina traha un ley cu no ta solamente na fabor di Gobierno pero cu ta un ley cu tur hende ta para su tras p’asina por percura cu e ley wordo forma exitosamente. Pa loke ta e importadonan, Ministerio di Minister Otmar Oduber mester bai comunica cu esakinan y tambe reunionnan cu diferente departamentonan y un di nan ta cu Duane, kende ta esunan cu ta autoridad riba e tema di importacion y na mesun momento duna informacion riba kico ta productonan alternativo cu por tin. Por bini cu un prohibicion pero mester duna tambe herment pa bin cu productonan alternativo. Esey ta tipo di strategianan cu Minister Otmar Oduber ta bai implementa. Pa tur hende por custumbra cu e situacion nobo aki lo tin un periodo di prueba caminda cu e ley mes lo bai na vigor den 2019 pero e sancionnan mes lo cuminsa den aña 2020 p’asina tur hende ta riba un mesun liña.