Indonesia ta confirma morto di 53 tripulante di submarino

E ekiponan di rescate a topa cu e barco kibra den tres pida den lama di Bali, y a confirma morto di e 53 tripulantenan. E motibo ta cu e submarino a bah ana un profundidad mas hopi di loke e tabata por a soporta. Esey a sosode na momento cu nantabata haci un simulacro di lansamento di torpedo.

A haya restonan di e submarine y consecuentemente a confirma fayecimento di e tripulacion. Esaki tabata un anuncio haci door di hefe military di Indonesia, Mariscal Hadi Tjahjanto: “Cu hopi dolor, como hefe di forsanan arma di Indonesia, e soldanan a perde nan bida mientras cu nan tabata cumpli cu nan deber den e area nort di Bali. Den nomber di tur e soldanan y e famia di Forsa Arma, mi ta expresa mi palabranan di condolencia na famia di esnan fayeci. Dios duna boso serenidad.”

Tambe e Presidente Joko Widodo a confirma e incidente y a manda su condolencia pa e familiarnan.

E restonan di KRI-Nanggala-402 tabata parti den tres parti na mas o menos 838 meter di profundidad. Tambe a haya obhetonan nobo, entre otro lifevest.

E submarine lo a scheur ora cu el a baha mas di loke e por soporta.

Diaranson ultimo e nave a baha pa cuminsa cu e simulacro di lansamento di torpedo, sinembargo, prome cu a duna autorisacion pa lansa e torpedo, a perde contacto cu e nave.

E hayazgo a sosode danki na participacion di un robot submarino di Singapur, cu  registro e imagennan. Prome, e submarine KRI Rigel a scan e zona. Parce e barco a bah ana mas di 400 meter, un profundidad cu a causa scheur.

Den e trabounan di rescate a participa varios decena di helicopter y barco, cu participacion di Estados Unidos, Australia, Singapur, Malasia y India.

Indonesia, prome cu e accidente tabata conta cu cinco submarino, dos Aleman tipo 209, entre cual ta inclui esun cu a sink, tres barco Zuid Koreano nobo. Esun KRI Nangala 402 ta den servicio desde 1981.

E sinkmento a habri e debate atrobe riba e necesidad pa renoba e flota maritime Indones cu ta basta bieu. Por ehempel, na Banyuwangi, na Java Oost, unda tin un base naval importante, e ciudadanonan a bisa cu e flota mester wordo renoba.

Indonesia ta e pais mas pobla na zuid oost di Asia y, ademas, ta e nacion, di e archipielago, mas grandi di mundo. E ta conta cu mas di 17.000 isla y den e ultimo añanan a registra diferente incidente di soberania cu barconan Chines, specialmente na Islanan Natuna.

 

Comments

comments