E CPI pa luna di Maart 2020 ta 101.43, loke ta representa un caida di 0.3% compara cu e indice di Februari 2020 (101.73).
E cambio di e CPI pa e ultimo diesdos (12) lunanan (Maart 2019 te cu Maart 2020) ta 3.5%, virtualmente e mesun cambio di porcentahe compara cu e periodo corespondiente di aña pasa (3.5%).
E promedio anual di e tasa di inflacion pa e periodo di Maart 2019 te cu Maart 2020 ta 4.6%, un subida di 0.7 ppt compara cu e 3.9% registra den e periodo di Maart 2018 te cu Maart 2019.
Durante e luna aki, ocho (8) di e diesdos (12) sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Transporte” (-1.4%) y “Cuminda y bebida no-alcoholico” (-0.7%), causando un efecto di -0.17 y -0.12 ppt, respectivamente. E caidanan den e restante sectornan a contribui cu un efecto di -0.11 ppt riba e CPI di Maart 2020.
E caidanan aki a wordo contraresta parcialmente door di subida den e indicenan di e sectornan di “Recreacion y cultura” (0.7%) y “Salud” (1.8%), cu a contribui cu un efecto di 0.07 y 0.03 riba e CPI di Maart 2020.
E caida den e sector di “Transporte” a wordo causa principalmente door di un caida di 1.6% den e categoria “Gasto relaciona cu uso di vehiculo di transporte personal”, causando un efecto di -0.13 ppt. E caida den e sector di “Cuminda y bebida no-alcoholico” a wordo causa principalmente door di un caida den e categoria “Cuminda” (-0.7%), causando un efecto di -0.12 ppt.
E subida den e sector di “Recreacion y cultura” a wordo causa principalmente door di un subida den e categoria “Otro articulo y ekipo pa recreacion, hardin y animal domestico” (2.2%), causando un efecto di 0.07 ppt. E subida den e sector di “Salud” a wordo causa principalmente door di subidanan di 3.6% y 1.0% den e categorianan “Servicio pa pacientnan externo” y “Producto, aparatonan y ekipo medico”, causando un efecto di 0.01 ppt cada un.
Canasta di consumo
E canasta di consumo di e CPI ta consisti di 408 bienes y servicionan. Compara cu Februari 2020, 33.3% di e bienes y servicionan aki a conoce un aumento di prijs causando un efecto di 0.44 ppt, mientras cu 39.5% ta mustra un caida di prijs, cu a contribui cu un efecto di -0.74 ppt y pa e restante 27.2% no tawata tin cambio den prijs. Prijsnan di bienes a baha cu 0.5% y a causa un efecto di -0.29 ppt. Prijsnan di servicionan a conoce un caida leve di 0.01% y a causa un efecto insignificante riba CPI di Maart 2020.
Core inflation
E CPIC (core inflation) – CPI excluyendo e efecto di energia y cuminda – a registra na Maart 2020 un subida di 4.3%. E indice di energia – cu ta consisti di e productonan: electricidad, awa, gasolin y diesel a registra un caida di -1.2%. E indice di cuminda a registra un subida di 12.7%.
Bestaansminimum
E bestaansminimum pa un hogar consistiendo di dos (2) adulto y dos (2) mucha (edad 0-14 aña) na Maart 2020 ta Afl. 5,009, un subida di Afl. 142 compara cu Maart 2019 (Afl. 4.867). E bestaansminimum pa un hogar di un (1) adulto ta Afl. 2,385, un subida di Afl. 68 compara cu Maart 2019 (Afl. 2.317).