E CPI pa luna di Juli 2018 ta 122.47, loke ta representa un subida di 1.5% compara cu e indice di Juni 2018 (120.69) y acumulando un subida di 4.1% te cu na Juli di e aña aki.
E cambio di e CPI pa e ultimo diesdos (12) lunanan (Juli 2017 te cu Juli 2018) ta 5.1%, un subida di 6.2 ppt compara cu e periodo corespondiente di aña pasa (-1.1%).
E promedio anual di e tasa di inflacion pa e periodo di Juli 2017 te cu Juli 2018 ta 1.3%, un subida di 1.7 ppt compara cu e -0.4% registra den e periodo di Juli 2016 te cu Juli 2017.
Durante e luna aki, tur diesdos (12) sectornan a registra subida di prijs. E subidanan cu tawata tin e mayor efecto riba e CPI a wordo registra pa e sectornan di “Transporte” (1.7%), “Cuminda y bebida no-alcoholico” (2.1%) y “Recreacion y cultura” (2.0%), causando un efecto di 0.32, 0.31 y 0.17 ppt, respectivamente. E subidanan den e restante sectornan a contribui cu un efecto di 0.68 ppt riba e CPI di Juli 2018.
E subida den e sector di “Transporte” a wordo causa principalmente door di un subida den e categoria “Gasto relaciona cu uso di vehiculo di transporte personal” (2.2%), causando un efecto di 0.21 ppt. E subida den e sector di “Cuminda y bebida no-alcoholico” a wordo causa door di subidanan di 1.8% y 4.0% den e categorianan “Cuminda” y “Bebida no-alcoholico”, causando un efecto di 0.23 y 0.08 ppt. E subida den e sector di “Recreacion y cultura” a wordo causa principalmente door di un subida den e categoria “Otro articulo y ekipo pa recreacion, hardin y animal domestico” (2.1%), causando un efecto di 0.06 ppt.
E canasta di consumo di e CPI ta consisti di 452 bienes y servicionan. Compara cu Juni 2018, 80.5% di e bienes y servicionan aki a conoce un aumento di prijs causando un efecto di 1.77 ppt, mientras cu 10.4% ta mustra un caida di prijs, cu a contribui cu un efecto di -0.30 ppt y pa e restante 9.1% no tawata tin cambio den prijs. Prijsnan di bienes a subi cu 1.6% na Juli 2018 y a causa un efecto di 1.00 ppt riba e CPI di Juli 2018. Prijsnan di servicionan a conoce un subida di 1.3% y a causa un efecto di 0.47 ppt.
E CPIC (core inflation) – CPI excluyendo e efecto di energia y cuminda – a registra na Juli 2018 un subida di 1.1%, cu ta 0.6 ppt mas halto compara cu e periodo corespondiente di aña pasa (0.5%). E indice di energia – cu ta consisti di e productonan: electricidad, awa, gasolin y diesel a registra un subida di 0.3%, cu ta 5.1 ppt mas halto compara cu e periodo corespondiente di aña pasa (-4.8%). E indice di cuminda a registra un subida di 4.1%, cu ta 3.4 ppt mas halto compara cu e periodo corespondiente di aña pasa (0.7%).
E bestaansminimum pa un hogar consistiendo di dos (2) adulto y dos (2) mucha (edad 0-14 aña) na Juli 2018 ta Afl. 4,539, mientras cu pa un hogar di un (1) adulto e suma ta Afl. 2,162.
Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na Juli 2018 e prijs promedio pa bari di petroleo (US$ 71.16) a conoce un subida di US$ 3.39 (5.0%) compara cu Juni 2018 (US$ 67.77).
E costo total di energia pa kWh pa un uso di electricidad te cu 500 kWh no a cambia na Juli 2018, el a keda Afl. 34.52 cent pa kWh. E costo total di energia pa kWh pa un uso di entre 501 – 1000 kWh no a cambia na Juli 2018, el a keda Afl. 35.72 cent pa kWh. Adicionalmente, e costo total di energia pa kWh pa un uso di electricidad riba 1000 kWh no a cambia na Juli 2018, el a keda Afl. 45.93 cent pa kWh. Prijs di electricidad y di awa no a cambia compara cu Juni 2018. Consecuentemente, e prijs promedio di electricidad pa vivienda a keda Afl. 265.65, mientras cu e prijs promedio di awa pa vivienda a keda Afl. 137.05.
Prijs di gasolin a subi na Juli 2018 cu Afl. 5.90 cent (2.8%) y a causa un efecto di 0.17 ppt riba e CPI. Prijs di diesel a registra un subida di Afl. 5.00 cent (2.8%) na Juli 2018 y a causa un efecto di 0.01 riba e CPI.
N juli 2018, utilidad, gasolin y diesel como grupo, tawata tin un subida di prijs di 1.0% compara cu Juni 2018 y hunto a influencia e CPI cu 0.17 ppt, mientras cu e restante 448 bienes y servicio hunto a experencia un subida di prijs di 1.6% y tawata tin un efecto di 1.30 ppt riba e CPI.