India ta adverti companianan pa no cumpra petroleo Venezolano

NEW DELHI, India- Gobierno Indio a impulsa un reduccion di e importacion di crudo Venezolano debi na e sancionnan Mericano na e petrolero estatal PDVSA, según e secretario di petroleo y gas natural di India, MM Kutty, dialuna den CERAWeek, un forum petrolero y gas natural cual a tuma luga na Houston.
Kutty a splica na periodistanan cu e companianan estatal tabata importa nada of casi nada di e compania estatal Venezolano y a enfatisa cu e gobierno Indio a alerta companianan priva riba e risico cu ta implica e haci negoshi cu e dictadura di Maduro. “Nos a informanan di e sancionnan y e consecuencianan cu esaki lo por tin pa nan”, el a bisa.
India tin un sector di refinacion cu ta depende den su mayoria di crudo pisa, e principal pais cu e ta haci negoshi cun’e ta Venezuela y un di e poco mercadonan na cual petroleo Venezolano ta yegando ainda.
Dia 28 di januari ultimo, gobierno Mericano a impone varios sancion riba PDVSA, e compania petrolero estatal di Venezuela, blokiando asina 7 biyon dollar, na mes momento cu e gobierno di Trump a bisa cu e lo transferi e control di e cuentanan di e empresanan estatal den teritorio Mericano na e opositor Juan Guaido, cu a huramenta como presidente interino dia 23 di januari ultimo.
“Maduro y sus colaboradonan a uza e compania estatal PDVSA pa controla, manipula y horta e pueblo Venezolano durante demasiado tempo y destrui e compania den e proceso aki”, e secretario di Estado, Mike Pompeo, a bisa ora di anuncia e medida na januari ultimo.
Merca ta exigi pa pagonan realisa na PDVSA wordo haci a traves di e cuentanan blokia poniendo un prohibicion na Merca di importacionnan di crudo Venezolano. Ademas, e transaccionnan entre companianan no Mericano y PDVSA cu ta involucra e sistema financiero di Merca of e agencianan di materianan prima na Merca lo ta prohibi desde 28 di april.
Según e secretario Kutty, India ta importa mas o menos 83% di su petroleo y rond di 50% di di su gas natural. E pais tabata un di e ochonan cual Merca a concede un excepcion ora cu na november 2018 a importa e sancionnan riba e crudo Irani. E extension ta caduca na mei, pero Kutty a evita di bisa di Merca lo prolonga of si lo tin modificacionnan. “Nos ta den dialogo cu nan, nos ta wak kico ta pasa”, e secretario a bisa y a agrega:”Tin tempo, Merca ta compronde nos problemanan”.
Dialuna Merca a sanciona un banco cu sede na Rusia pa a haci negoshi cu e regimen “ilegitimo di Nicolas Maduro, birando asina e prome institucion financiero stranhero pa wordo castiga pa su lasonan cu Caracas.

Comments

comments