Diamars ultimo, directiva di SIMAR huntu cu representantenan di sindicato SEPPA a reuni cu minister di enseñansa Dhr. Rudy Lampe pa trata e topico di independisacion di scolnan publico. Durante dicho reunion e minister a amplia riba su vision y a duna mas splicacion tocante e puntonan di atencion cu e cambio aki lo por trece.
E reunion a cana den un bon esfera caminda tur partido a haya e oportunidad pa trece nan preocupacionnan y preguntanan dilanti.
Mester remarca cu e topico aki ta uno hopi delicado ya cu algun factor ainda mester ser aclarea y analisa cuidadosamente. E preocupacion mas grandi di e cambio aki ta e posicion huridico di esnan concerni.
Directiva lo reuni cu SEPPA pa evalua e contenido di dicho reunion y pa scucha nan posicion pa cu nan miembronan. SIMAR no a tuma un posicion concreto ainda, mirando cu tin dialogo pendiente pa trata e topico y tambe mester scucha su miembronan.
SIMAR ta yama su miembronan, specialmente empleadonan di DPS, pa un reunion extraordinario DIAMARS 20 di februari pa 7:00 pm na su cede.