Incinerator mester pasa den un test so pa cuminsa funciona

Durante un conferencia di prensa na DOW, e director ing. Marlon Croes a splica henter e situacion rond di e incinerator chikito instala na Parkietebos. E conferencia tabatin como meta pa reacciona riba diferente publicacionnan relaciona cu e incinerator, cualnan no ta corecto.

Ing. Croes tabata compaña pa George Croes, Director di Directie Wetgeving en Juridische Zaken.

El a cuminsa pa splica cu na aña 2020 DOW a tuma over e proyecto di incinerator for di Serlimar, cu na e momento ey tabata den un situacion financiero dificil y no por a cumpli cu e contracto cu CTC (operador y proveedor). Mester a haci esaki, pasobra e lo a bira un inversion morto. Banda di esaki, e incinerator ta un forma hopi mas limpi pa procesa e slip cu DOW ta hay’e cu ne na e plantanan di purificacion. DOW a pensa pa inclui den e proceso “medical waste” y cadavers. Tur e componentenan actualmente ta wordo kima den aire liber y ta bay den aire.

Na momento cu a tuma over, DOW a tuma tambe e contracto di compra cu SERLIMAR tabatin cu CTC. Pa esaki a inverti sumanan substancial pa caba di haci e instalacionnan necesario pa incinerator start y opera.

A pasa den retraso debi na e hindervergunning cu mester a proceso y a haya nan mes cu un caso sumario contra nan, unda a pone exigencianan cu nan mester cumpli cu nan. Un di nan ta cu ora e biento ta di cierto direccion cu ta stroba e habitantenan, mester stop e operacion. Pa esaki mester a haci uzo di un sistema unda tur hende por mira di ki direccion e biento ta. Un sistema di vigilancia pa e emisionnan di e incinerator. Mester a haci inversion adicional pa cumpli cu e sentencia di Corte.

Croes a desmenti sumanan grandi cu ta menciona cu a paga CTC.

DOW y Gobierno a cumpli cu tur rekisito y ta cla pa haci e test rekeri di ekiponan industrial prome cu nan por bay den funcion.  Na momento cu e test ey sali positivo, ta bay invita prensa pa mira funcionamento di e aparato, ing. Marlon Croes a bisa. El a agrega cu e incinerator ta situa den un area industrial y Corte no a menciona nada di busca otro sitio.

Director di DOW a splica tambe cu na momento cu incinerator bay den operacion, cu e parti di slip, medical waste y cadaver (di bestianan), lo kita un 13% mas di sushi for di e dump publico. “Gobierno ta trahando pa reduci e cantidad di sushi cu ta yega dump. Esaki ta nifica cu 80% ta bay Ecogas y 13% ta wordo kima na un forma sostenibel (limpi) cumpliendo cu tur criterionan di salubridad publico. Tin un sistema digital instala riba e incinerator, via cual DVG 24 ora pa dia por vigila cu ta cumpli cu e standardnan poni.”

Comments

comments